Tramp avropalı həmkarları ilə söhbətində Ukraynanı “Rusiyanın bir hissəsi” adlandırıb

ABŞ-ın keçmiş prezidenti Donald Tramp Avropa liderləri ilə söhbətində Ukraynanı Rusiyanın bir hissəsi adlandırıb.

Ens.az Bizimyol.info-a istinadən xəbər verir ki, bu barədə bazar ertəsi "Wall Street Journal" mənbələrə istinadən məlumat yayıb.

Amerika rəsmiləri bildirirlər ki, ABŞ-ın eks-prezidenti Avropa liderləri ilə söhbətində Ukraynanı “öz Ukraynası” və ya “Rusiyanın bir hissəsi” adlandırıb.

Onlar deyirlər ki, Tramp illərdir Ukraynanı korrupsioner ölkə kimi tənqid edib. Eks-prezident də tez-tez Vaşinqtonun Kiyevi dəstəkləməsindən şikayətlənib.

Bundan əvvəl “The Wall Street Journal” yazıb ki, amerikalı qanunvericilər, xüsusən də ABŞ Konqresinin respublikaçı senatorları Trampla görüşlər zamanı sonuncunu Kiyev hakimiyyətinin Rusiya üzərində qələbə qazanacağı təqdirdə onlara verilən bütün kreditləri qaytara biləcəklərinə inandırıblar.

Aprelin 20-də ABŞ Konqresinin Nümayəndələr Palatasında Ukrayna, İsrail və Tayvana hərbi yardım göstərilməsi, Rusiyanın dondurulmuş aktivlərinin Kiyevə verilməsi məqsədilə müsadirə edilməsi, habelə Çinə qarşı əlavə sanksiyaların tətbiqi haqqında qanun layihələri təsdiqlənib. Paketin həcmi 95 milyard dollar təşkil edib. Buraya, xüsusən, Ukrayna üçün 61 milyard dollar, İsrail üçün 26 milyard dollar, həmçinin Qəzza zolağı da daxil olmaqla münaqişə zonalarında mülki şəxslərə humanitar yardım göstərmək üçün vəsait daxildir.

İndi qanun layihələri ABŞ Senatı tərəfindən təsdiqlənməlidir, onlara baxılması aprelin 23-də başlayacaq. Əgər onlar qəbul edilərsə, imza üçün ABŞ prezidenti Co Baydenə göndəriləcək. Amerika lideri artıq bu qanun layihələri paketini imzalamağa söz verib.

Bundan əvvəl Rusiya Xarici İşlər Nazirliyi bəyan etmişdi ki, Kiyevə hərbi yardım göstərmək yalnız Ukraynadakı münaqişənin həllini çətinləşdirir.