Yaz depressiyasından qurtuluş yolu: sarı geyinin

Həkim-terapevt Adil Qeybullanın sözlərinə görə, yaz aylarında ən çox rast gəlinən problemlər mədə-bağırsaq, vitamin çatışmazlığı və allergiyadır. 

O bildirir ki, orqanizmdə yaranan problemlərlə yanaşı, sinir sistemində də dəyişiklik baş verir. Bu zaman bəzi insanlarda depressiv hallar müşahidə edilir. Müsahibimiz deyir ki, insanlarda D vitamininin çatışmazlığı da depressiyanın səbəblərindən biridir.

Həkim bu ərəfələrdə meyvə və tərəvəzdən bol istifadəni və idmanla məşğul olmağı məsləhət görür.

Psixoloq Təhminə Çələbi deyir ki, fəsillər dəyişdikcə insanlarda adaptasiya prosesi baş verir və psixoloji pozuntular varsa, bu zaman üzə çıxır.

Müsahibimizin sözlərinə görə, bu fəsildə kimi depressiv, kimi isə hiperaktiv olur.

Psixoloq bildirir ki, yazda sarı rəngdən istifadə etdikdə depressiya halları daha az olur.

O deyir ki, fəsillərin dəyişməsi insan ruhuna müsbət təsir göstərir və müşahidələrə əsasən, ən çox intihar hadisələri fəsillər dəyişməyən ölkələrdə baş verir.

İlhamə Kələyeva, Orxan Hüseynzadə