ÜST Azərbaycanda uşaqların həyat şəraitini qiymətləndirib

Ümumdünya Səhiyyə Təşkilatının (ÜST) məlumatına görə, Avropada 190 milyon nəfər uşaq və 18 yaşa qədər insan yaşayır. Onlardan 44 milyon nəfəri fiziki zorakılığa, 18 milyon nəfəri seksual zorakılığa məruz qalıb, 55 milyon nəfəri isə psixoloji travma alıb. Bu hadisələrin 90 faizi heç kim tərəfindən nəzərə alınmır və gizli qalır.

Oxu.Az “BMT xəbərləri”nə istinadən məlumat verir ki, bu mənada ən yaxşı vəziyyət Azərbaycan, Gürcüstan və Ermənistanda qeydə alınıb.

Avropa regionunda uşaq və yeniyetmələrin intihar hallarının sayına görə ilk yerdə Rusiya dayanır. Siyahıda növbəti pillələrdə Latviya, Belçika, Finlandiya, Moldova, Ukrayna və Qazaxıstan qərarlaşıb.

Uşaq intiharlarının əsas səbəbi əksər hallarda onlara qarşı qəddar davranışdır. ÜST tibb işçilərinə belə halları aşkarlayıb lazımi tədbir görülməsini, valideynlərin uşaq tərbiyəsi yönündə maarifləndirilməsini, uşaqlara isə özünümüdafiə yollarının öyrədilməsini çıxış yolu kimi tövsiyə edir.