Soğanın qiyməti ucuzlaşmayacaq - Səbəb

İranda iqlim şəraiti dəyişmədikcə, soğanın qiyməti baha olacaq.

Metbuat.az xəbər verir ki, bunu İranın şərqində yerləşən Rəzəvi Xorasanı vilayəti Kənd Təsərrüfatı İdarəsinin rəhbəri Nəcəfqulu Salehi deyib.

İranın kənd təsərrüfatı nazirinin müavini Abbas Keşavərz isə kənd təsərrüfatına dəyən ziyanın detallarına aydınlıq gətirib.

A.Keşavərzin sözlərinə görə, sel və daşqınlar təxminən 1 milyon hektar sahəyə ziyan vurub.

Nazir müavini bildirib ki, Xuzistan, Lorestan, Gülüstan, Mazandaran, İlam və Kirmanşah vilayətlərinin bağ və əkin ərazilərinə ciddi şəkildə ziyan dəyib.

İranda mart ayının ortalarından başlayan yağıntılar soğan və kartof kimi kənd təsərrüfatı məhsullarının bahalaşmasına gətirib çıxarıb. Belə ki, soğan 150 min riala (təxminən 3,57 dollar) bahalaşıb. Bununla əlaqədar İranın Sənaye, Mədən və Kənd Təsərrüfatı Nazirliyi aprel 4-dən soğanla yanaşı, kartofun da ixracına qadağa tətbiq edib.