Şəxsi mənzilləri zəbt edən köçkünlər həmin evlərdən çıxarılacaq

Digər vətəndaşlara məxsus şəxsi mənzilləri zəbt etmiş məcburi köçkünlər yeni evlərə köçürüləcəklər.

FED.az xəbər verir ki, məlumatına görə, bu barədə 2019-cu il dövlət büdcəsinin zərfində qeyd edilib.

Sənədə bildirilib ki, bu məsələ 2019-2022-ci illər üzrə qaçqınlar və məcburi köçkünlər üzrə dövlət siyasətinin əsas istiqamətlərindən biri kimi müəyyən edilib.

Digər prioritetlər isə Bakı və Sumqayıt şəhərlərində qəzalı obyektlərdə müvəqqəti məskunlaşmış məcburi köçkün ailələrinin yeni mənzillərə köçürülməsi, sahibkarlıq fəaliyyəti ilə məşğul olan məcburi köçkünlərə mikrokreditlərin verilməsi olacaq.

Bununla yanaşı, Cəbrayıl rayonunun Cocuq Mərcanlı kəndində yaşayan məcburi köçkünlərin məşğulluğunun təmin edilməsi üçün layihələrin həyata keçirilməsi nəzərdə tutulur.

Sənəddə həmçinin qeyd edilib ki, 2019-cu ilin dövlət büdcəsindən Qaçqınların və Məcburi Köçkünlərin İşləri üzrə Dövlət Komitəsinə ayrılacaq vəsait artırılır.

Belə ki, gələn ilin dövlət büdcəsindən komitəyə 2 milyon 705 min 359 manat vəsaitin ayrılması planlaşdırılır. Bu da 2018-ci ildəki məbləğdən 516 min 281 manat çoxdur.

Qeyd edək ki, büdcə zərfinə daxil olan "2019-cu il dövlət büdcəsi haqqında”, " 2019-cu il üçün yaşayış minimumu haqqında”, "2019-cu il üçün ehtiyac meyarının həddi haqqında”, "Dövlət Sosial Müdafiə Fondunun 2019-cu il büdcəsi haqqında” qanun layihələri Milli Məclisin noyabrın 13-ü, 14-ü, 15-i, 23-ü və 30-da keçiriləcək plenar iclasında müzakirəyə çıxarılacaq.