Qırğızıstanlı döyüşçü: “UFC döyüşlərinə Azərbaycan papağında çıxacağam”

“Bundan sonra UFC döyüşlərinə hər zaman Azərbaycan papağında çıxacağam”.

“Sputnik”in məlumatına görə, bunu əslən azərbaycanlı olan qırğızıstanlı döyüşçü Rafael Fiziyev deyib.

O, bu papağın Azərbaycandan olan qardaşlar tərəfindən hədiyyə olunduğunu deyib.

“Onu mənə Aqşin Babayev verib. Çoxdandır ki, Azərbaycan papağı ilə çıxmaq istəyirdim, ancaq məndə yox idi. Bundan sonra hər zaman başıma onu qoyacağam”.

R.Fiziyev bu papağın onun məşqçisi Pavel Fedotov tərəfindən qoyulan “Ataman” ləqəbi ilə yaxşı uyuşduğunu da bildirib.

O, həmçinin, Azərbaycanın milli baş geyimi olduğu üçün  bu papağın xüsusi dəyər daşıdığını deyib və  tarixi vətənində olmaq arzusundan da danışıb:

“Heç vaxt Azərbaycanda olmamışam, amma nə vaxtsa mütləq gedəcəyəm”.

İdmançı Ermənistanla gərginliyə toxunaraq, həqiqətin Azərbaycanın yanında olduğunu vurğulayıb.

Qeyd edək ki, R.Fiziyev dünyanın ən nüfuzlu döyüş təşkilatında oynayan yeganə azərbaycanlıdır. Bu yaxınlarda döyüşçü Əbu-Dabidə UFC-də üçüncü mübarizəsi zamanı rəqibi britaniyalı Mark Diakeziyə qalib gəlib.

Mənbə: Oxu.az