Nikoldan Qarabağ erməniləri ilə bağlı sensasion tapşırıq

Ötən gün uzun fasilədən sonra “Mülki müqavilə” fraksiyasının deputatları Paşinyanla görüşüb və üç saatdan çox müzakirə aparıblar. Maraqlıdır ki, mümkün məlumat sızmalarının və onların nəticələrinin qarşısını almaq üçün deputatlara görüş barədə iclasdan beş dəqiqə əvvəl xəbər verilib.

Axar.az xəbər verir ki, bu barədə “Hraparak” nəşri məlumat yayıb.

“Paşinyan Qarabağda baş verənlərdən danışaraq, dövlət qurumlarına Qarabağ ermənilərinin nəinki ən sürətli və maneəsiz köçürülməsini, həm də onların işlə təmin olunması məsələlərini təşkil etməyi tapşırıb. Amma heç bir şəkildə onların İrəvana köçürülməsinə imkan verməməyi vurğulayıb. O, rusların fəaliyyətlərini davam etdirmək üçün Qarabağda müəyyən sayda insanı saxlamağa çalışacaqları ilə bağlı təəssüratını bölüşərək qeyd edib ki, bu, artıq Ermənistan üçün problem deyil, qoy ruslar Azərbaycanla problemlərini həll etsinlər.

Sonra Nikol oktyabrın 5-də baş tutacaq görüşdən danışıb. Məlumdur ki, İspaniyanın Qranada şəhərində keçiriləcək AB sammitində Əliyevlə Paşinyan arasında AB Şurasının sədri Mişel, Fransa Prezidenti Makron və Almaniya kansleri Şoltsun iştirak edəcəyi görüş planlaşdırılır. İclasda bildirilib ki, çoxdan gözlənilən sülh müqaviləsinin imzalanması yaxındır və bu sənədin imzalanmasının əsasları oktyabrın 5-də keçiriləcək görüşdə qoyulmalıdır. Qranadada bunlar qəbul olunacaq: delimitasiya, bir-birinin ərazi bütövlüyünün tanınması və s. Paşinyan az qala açıq şəkildə bəyan edib ki, Ermənistan Rusiyanı regiondan sıxışdırıb çıxarır və prosesin faktiki başlanması da oktyabrın 5-də keçiriləcək görüşdə elan olunacaq. Nikol izah edib ki, Qarabağın itirilməsindən sonra 9 (10) noyabr bəyanatı da qüvvəsini itirir və bununla da Rusiya tərəfinin roluna son qoyulur. Və Rusiyanı Ermənistandan sıxışdırmaq üçün siyasi kursun qəbul edilməsinə baxmayaraq, Paşinyan komanda yoldaşlarını daha diqqətli və sakit olmağa, Rusiyaya ünvanlanan birbaşa bəyanatlardan çəkinməyə çağırıb ki, bu da onların hökuməti üçün dönməz nəticələrə gətirib çıxara bilər. Paşinyanın sözlərinə görə, bunu birbaşa deyil, media və saxta səhifələr vasitəsilə müzakirə etmək olar”, - məlumatda deyilir.

İclasda KTMT-dən çıxmaq, Ermənistanın bəzi sərhədyanı rayonlarında Rusiya sülhməramlılarının gələcək taleyi ilə bağlı suallar qaldırılıb:

“Lakin Paşinyan bunları gündəmə gətirməyə meyilli olmayıb, o, bu barədə danışmayacağını kəskin şəkildə açıqlayıb. Nikol Roma Statutunun da ratifikasiya olunmalı olduğunu vurğulayaraq, son günlər bu məsələ ilə bağlı verdiyi açıqlamalara diqqət yetirməyi və çıxış edərkən bu xəttə əməl etməyi tövsiyə edib”.