Məhəmməd Füzuli - Nə görər əhli-cəfa məndə vəfadən qeyri
Nə görər əhli-cəfa məndə vəfadən qeyri.
Nə bulur şəmi yaqan kimsə ziyadən qeyri.
Ey olan sakini-məscid, nə bulubsan bilmən,
Buriyasında onun buyi-riyadən qeyri.
Gəl xərabatə, nəzər saqiyə qıl kim, yoxdur
Rüxi-safü meyi-safində səfadən qeyri.
Sərbəsər vadiyi-mehnətdirü ğəm mülki-vücud,
Bir fərağət yeri yox şəhri-fənadən qeyri.
Cümleyi-xəlq mənə yar üçün əğyar oldu,
Qalmadı kimsə mənə yar xudadən qeyri.
Əzmi-kuyində könül yarlıq istər bizdən,
Əlimizdən nə gəlir xeyr-duadən qeyri.
Fəqr imiş, fəqr, Füzuli, şərəfi-əhli-vücud,
Özünə eyləmə həmdəm füqəradən qeyri.
Məqaləni bəyəndiniz? Sosial şəbəkələrdə izləyin!
Şərhlər
Şərhləri göstər Şərhləri gizlət