“Azərsu” sədri Şəkidə qəbul keçirib

“Azərsu” Açıq Səhmdar Cəmiyyətinin sədri Qorxmaz Hüseynov 19 iyul 2019-cu il tarixində Şəki şəhərində Şəki və Qax rayonlarından olan sakinləri qəbul edib.

“Qafqazinfo” xəbər verir ki, qəbuldan əvvəl Qorxmaz Hüseynov və Şəki Şəhər İcra Hakimiyyəti başçısının müavini Zərinə Cavadova ümummilli lider Heydər Əliyevin abidəsini ziyarət edib.

“Şəki Sukanal” Törəmə Səhmdar Cəmiyyətinin inzibati binasında keçirilən qəbulda Şəki və Qax rayonlarından olan 25 vətəndaşın müraciət və şikayətlərinə baxılıb. Müraciətlər əsasən içməli su təchizatı və kanalizasiya xidmətlərinin, içməli sudan əziyyət çəkən kəndlərin su təchizatının yaxşılaşdırılması, işə qəbul və digər məsələlərlə bağlı olub.

Qəbulda hər bir vətəndaşın müraciətini dinləyən “Azərsu” ASC-nin sədri şikayətlərin qısa müddətdə araşdırılaraq zəruri tədbirlərin görülməsi barədə aidiyyəti struktur bölmələrinin rəhbərlərinə tapşırıqlar verib. Vətəndaşlar tərəfindən qaldırılan məsələlərin bir qismi yerində həll olunub, araşdırılmasına ehtiyac olan müraciətlər isə nəzarətə götürülüb.

Qəbuldan sonra “Azərsu” ASC-nin sədri Qorxmaz Hüseynov “Şəki şəhərinin içməli su təchizatı və kanalizasiya sistemlərinin yenidən qurulması” layihəsinin icra vəziyyəti ilə tanış olub, tikinti-quraşdırma işləri davam edən ərazilərə baş çəkib.