Azərbaycanda kəskin bahalaşma baş verə bilər - AÇIQLAMA

“İrandan gətirilən malların çeşidinin çoxluğunu nəzərə alsaq, sərhədlərin bağlanması Azərbaycan bazarında qiymətlərin yüksəlməsinə gətirib çıxaracaq. Eyni məhsulları Türkiyədən, Rusiyadan almaq olar, amma bu daha baha qiymətə başa gələcək”.

Bu sözləri Redaktor.az-a açıqlamasında iqtisadçı ekspert Natiq Cəfərli deyib. O bildirib ki,  Çindən məhsulların idxalının dayandırılması, Çinlə ticarət əlaqələrinin zəifləməsi, Azərbaycan bazarında qiymət artımının sürətlənməsi ehtimalını yüksəldir:

“Ötən il Çindən 1,5 milyard dollarlıq məhsul alınıb. Minlərlə çeşidi olan məhsulları əvəz edə biləcək digər ölkələrlə hələ indi danışıqlar başlayıb. Yenidən müqavilələrin bağlanması uzun zaman alacaq. Məhsulların qiymətinin ucuzluğu baxımından Çin bazarının alternativi yoxdur. Lakin Çindən gətirilən məhsullara qadağaların qoyulması, həmçinin İranla sərhədlərin bağlanması, Azərbaycan bazarında ciddi qiymət artımına təkan verən amilə çevrilə bilər”.

İqtisadçı onu da qeyd edib ki, vəziyyət ciddiləşərsə, həm Türkiyə, həm də İranın sərhədləri bağlaması ilə Naxçıvan Muxtar Respublikası blokada vəziyyətinə düşə bilər. Bunun üçün Azərbaycan kifayət qədər işlər görməlidir:

“Sərhədlərin bağlanması Naxçıvanın blokada vəziyyətinə düşməsinə, həmçinin, məhsulların azalması, bazarda kifayət qədər problemlər yarada bilər. Bu tarixdə yaşanmış "Berlin Körpü Əməliyyatı"nı xatırladır. Bu əməliyyat çox baha başa gəlsə də, ən azından həmin insanların aclıqdan əziyyət çəkməməsinə yardım etdi və çox uğurlu əməliyyat kimi tarixə düşdü. Əgər vəziyyət çox ciddiləşsə, belə bir çətinlik yaransa, Azərbaycan höküməti də təyyarələr vasitəsilə Naxçıvana ərzaq məhsulları və ya dərman preparatlarının aparılması ilə bağlı qərar verməlidir”.

Ekspert onu da vurğulayıb ki, əsasən sərhədyanı ticarətdə problemlərin yaşanması ehtimalını ortaya qoyur:

“İranla sərhədyanı ticarətdə məşğul olan, bununla pul qazanan, öz gündəlik dolanışığını İranda etdiyi bazarlıqla təmin edən minlərlə vətəndaş var. Sərhədlər bağlanarsa, onların dolanışığına daha ciddi mənfi təsir göstərəcək”.

Sevda Ulutau