AMEA-nın vitse-prezidenti, akademik İbrahim Quliyev Rusiya Elmlər Akademiyasında olub

Azərbaycan Milli Elmlər Akademiyasının vitse-prezidenti, akademik İbrahim Quliyev Rusiya Federasiyasına səfər edib. Səfər çərçivəsində akademik Rusiya Elmlər Akademiyasının (REA) prezidenti, akademik Aleksandr Sergeyevlə görüşüb.

Görüşdə akademik Aleksandr Sergeyev REA-nın ötənilki fəaliyyəti haqqında danışıb. Akademiyalar arasında elmi əlaqələrin inkişafına xüsusi toxunan A.Sergeyev uzun illərdir REA ilə AMEA-nı səmərəli əməkdaşlıq birləşdirdiyini deyib.

Akademik İbrahim Quliyev öz növbəsində REA-nın rəhbərliyinə səmimi qəbula görə təşəkkürünü bildirib. Ötən ilin AMEA üçün də səmərəli olduğunu qeyd edən İ.Quliyev yeni layihələrə imza atıldığını, dünyanın müxtəlif ölkələrinin, o cümlədən Rusiyanın aparıcı elmi mərkəzləri ilə əməkdaşlığın genişləndirildiyini, müştərək tədqiqat və layihələrin həyata keçirildiyini söyləyib. Akademik REA-nın prezidentinin başçılığı altında nümayəndə heyətini AMEA-ya dəvət edib.

Sonra tərəflər gələcəkdə müxtəlif sahələr üzrə fundamental və tətbiqi tədqiqatlara yönələn potensialın genişləndirilməsi məqsədilə əməkdaşlıq haqqında sazişin yenidən imzalanması məsələsini müzakirə ediblər.

Görüşdə REA-nın prezidentinin müavini, akademik Taliya Xabriyeva, Xarici Əlaqələr İdarəsinin rəisi Olqa Qluxovtseva və Q.V.Plexanov adına RİU-nun Hüquqi Tədqiqatlar və Regional İnteqrasiya İnstitutunun direktoru, professor Rəşad Qurbanov iştirak ediblər.