AMB: "Azərbaycanda hər 100 manatlıq əməliyyatın 62 manatı elektron bankçılığın payına düşür"

"Bank sektorunda innovasiya texnologiyalarının tətbiqinə pandemiyadan çox öncə başlanılıb və pandemiyanın daha çox vüsət alması rəqəmsallaşmanı sürətləndirmişdi. Pandemiya insanların bulud texnologiyalarına, süni intellekt həllərinə olan inamı daha da artırıb".

Ens.az Report.az-a istinadən xəbər verir ki, bunu “Rəqəmsal Ekosistemin İnkişafında Maliyyə İnstitutlarının Rolu” mövzusunda onlayn konfransda çıxışı zamanı Mərkəzi Bankın Baş direktoru Fərid Osmanov deyib.

F.Osmanovun sözlərinə görə, artıq vətəndaş və biznes mühiti daha çox internet həllərdən daha aktiv istifadəyə başlayıb:

“Beynəlxalq Valyuta Fondu tərəfindən aparılan araşdırmaya görə, məhz pandemiya dövründə son ilki illə müqayisədə rəqəmsal ödəniş alətlərindən istifadə edənlərin sayı 21 % artıb.

Pandmeiyanın təsirləri məhz ölkəmizdə də rəqəmsallaşmada və internet bankçılığının həyata keçirilməsində öz töhfəsini verib. Belə ki, 2020-ci ilin sonuna ölkə banklarında mövcud olan cari hesabların sayı 2019-cu illə müqayisədə 16 % artıb. Həmçinin cari hesablardan həyata keçirilən müştəri ödənişlərinin sayında 53 % artım müşahidə edilib. Burada məhz internet bankçılığının payı kifayət qədər böyükdür. 2020-ci il müştərilərin cari hesablarında apardıqları köçürmələrinin sayının 75 %-i, həcminin isə 62 %-i elektron bankçılığının xidmətlərin payına düşür. Başqa sözlə desək cari hesablarda aparılan hər 100 manatlıq əməliyyatın 62 manatı internet yaxud mobil bankçılığın payına düşür”.

AMB rəsmisi deyib ki, bank sektorunun rəqəmsallaşması həmçinin qarşıya bir sıra problemlərin həllini qoyur:

“Bunlardan da biri və önəmlisi maliyyə xidmətlərinə əlçatanlığın artırılması, maliyyə intensivliyinin genişləndirilməsi məsələsidir. Dünya Bankının apardığı sorğulara əsasən məhz 2017-2018-ci illərdə dünya əhalisinin hələ də 1,7 mlrd hissəsi bank hesablarına malik deyillər. Bu respondentlər üzrə aparılan sorğularda onların 22 %-i bank filial və şöbələrindən uzaq düşdüklərini bildirirlər".