ABŞ Senatı hökumətin maliyyələşdirilməsi ilə bağlı qanun layihəsini sentyabrın sonuna kimi dəstəkləyib

ABŞ Konqresinin tam Senatı cümə günü bəzi federal departamentlərin 2024-cü maliyyə ilinin sonuna qədər (30 sentyabr) işinə vəsait ayıran qanun layihəsini təsdiqləyib.

Ens.az Bizimyol.info-a istinadən xəbər verir ki,bu barədə "C-SPAN" kanalı məlumat verib.

Qanun layihəsinə Konqresin yuxarı palatasının 75 üzvü razılıq verib, 22-si isə əleyhinə çıxıb. Bu həftənin əvvəlində sənəd ABŞ Konqresinin Nümayəndələr Palatası tərəfindən tam təsdiq edilib.

Qanun layihəsi indi imzalanmaq üçün ABŞ prezidenti Co Baydenə göndəriləcək. Bu, maliyyələşmənin dayandırılması ilə əlaqədar federal hökumətin fəaliyyətinin qismən dayandırılmasının (bağlanmasının) qarşısını alacaq. "Yaxın saatlarda belə bir irəliləyiş baş verə bilər", - deyə məlumatda qeyd edilib.

Paket qanun layihəsi bəzi agentliklər üçün 460 milyard dollardan çox maliyyə vəsaitini ehtiva edir. Senat çoxluğunun lideri Çak Şumer martın 3-də bildirib ki, ABŞ Konqresindəki Demokratlar və Respublikaçılar 2023-cü il oktyabrın 1-dən başlayan 2024-cü maliyyə ilinin sonuna qədər federal hökumətin işi üçün vəsaitin ayrılmasını təmin edəcək, bununla bağlı razılaşmalar əldə ediblər.