Yeni Mercedes-Benz GLS modelinin şəkilləri peyda olub

Dərc edildi: 15 aprel 2019, 12.11 Baxış sayı: 1608

Bü günlərdə Mercedes-Benz şirkəti rəsmi olaraq yeni nəsil GLS krossoverini təqdim etməlidir. Artıq yeni krossoverin yüngül kamuflyajlı şəkillərini və onun haqqında müəyyən məlumatı dərc etmişik. Keçən həftənin son günü isə, yeni krossoverin rəsmi şəkilləri Facebook sosial şəbəkəsində Carpix tərəfindən dərc edilib.

Yeni GLS modelinin mühərrik çeşidinə stratyor-generatoru olan 3,0-litrlik sıralı altı silindrli mühərriklərin daxil olacağını ehtimal etmək olar. Bu aqreqatların güc diapazonu 340-460 at qüvvəsi arasında olmalıdır. Bundan başqa, mühərrik çeşirində 630 at qüvvəsi hasil edən 4,0-litrlik V8 mühərrikinin də daxil ediləcəyi şübhəsizdir. Bu mühərrik “bərkgedən” Mercedes-AMG GLS 63 4Matic modifikasiyasının kapotunun altında quraşdırılacaqdır.

Əlbəttə ki, müasir cərəyanlara uyğun olaraq, hibrid modifikasiyaların təklif ediləcəyi də gözləmək gərəkdir. Şayiələrə görə, Mercedes-Benz GLS 560 S versiyası 370 at qüvvəli 3,0-litrlik turbomühərrik və onunla tandemdə çalışan 120 at qüvvəsi və 440 Nm fırlanma anı hasil edən elektromotor ilə təchiz ediləcəkdir. Bundan başqa, “bərkgedən” Mercedes-AMG GLS 73 4Matic modifikasiyasının və 2,0-litrlik dörd silindrli turbomühərrikin bazasında yaradılmış hibrid aqreqatına məxsus olan əlçatan variantın da təklif ediləcəyi istisna olunmur. Sonuncu modifikasiya yalnız Çin bazarında satılacaqdır.