Ukrayna və Rusiya qaz tranziti barədə razılığa gəldi

Ukrayna və Rusiya qaz tranziti barədə razılığa gəldi

Rusiya və Ukrayna gələn ildən Avropaya qaz nəqlinə dair prinsipial razılığa gəlib.

“Qafqazinfo”nun “İnterfaks”a istinadən verdiyi xəbərə görə, bu barədə Avropa Komissiyasının vitse-prezidenti Maroş Şefçoviç məlumat yayıb.

Şefçoviç əldə olunan razılaşmanın 21 dekabrda müzakirə ediləcəyini qeyd edib və bunu Avropa, Rusiya və Ukrayna üçün müsbət xəbər adlandırıb.

Rusiyanın Energetika naziri Aleksandr Novak “TASS”a açıqlamasında tərəflərin gələcək razılaşma üçün detallı bir protokol hazırladıqlarını bildirib.

Onun sözlərinə görə, sözügedən sənəd yaxın zamanda hazırlanacaq: “Ümid edirəm ki, yaxın vaxtlarda yekun razılığa gələcəyik”.

Qeyd edək ki, Rusiya ilə Ukrayna arasındakı hazırkı qaz tranziti müqaviləsi dekabrın sonunda başa çatır. Kiyev zəmanətli tədarük həcmi ilə uzunmüddətli saziş bağlamaqda israr edir.