UEFA Azərbaycan klublarına 'Fair Play'ə görə ödəniş edib

UEFA Çempionlar Liqasında və Avropa Liqasında 2018/19-cu il mövsümündə iştirak etmiş klubların arasında Financial Fair Play (FFP) qaydalarına əməl edilməməsi səbəbindən tutulan vəsaitin paylanması mexanizminə əsasən, Avropa futbol qurumu tərəfindən ayrılmış 73 min 170 avro vəsait AFFA-nın vasitəsilə klubların hesabına köçürülüb.

"Report"un məlumatına görə, "Qarabağ"a 54 min 120, "Keşlə", "Qəbələ" və "Neftçi"nin isə hərəsinə 6 min 350 avro ödəniş olunub. “Keşlə” klubu üçün nəzərdə tutulmuş vəsait klubun aylıq cari xərclərini ödəmək üçün növbəti aylarda Futbolun İnkişaf Fondundan klubun hesabına köçürüləcək.

Qeyd edək ki, məbləğin 80%-i UEFA Çempionlar Liqasının və ya UEFA Avropa Liqasının qrup mərhələsində oynayan klublara, 20%-i isə hesablaşma müqavilələri imzalayan klublar istisna olmaqla, UEFA Çempionlar Liqasının və ya UEFA Avropa Liqasının seçmə mərhələlərini adlaya bilməmiş klublara bərabər hissələrlə paylanır.