Tullantı taxtalardan sənət yaradan usta

Bəzən yararsız bildiyimiz tullantılardan digər işlərə lazım olan maraqlı bəzək əşyaları və müxtəlif fiqurlar hazırlamaq olur. Heç kəsin önəm vermədiyi taxta parçalarına yeni həyat verən qəhramanımızın etdiyi kimi.

Kürdəmir sakini Emin İsmayılov illərdən bəri dülgərlik sənəti ilə məşğuldur. Uşaq yaşlarından bu sənətə həvəsi olan Emin artıq peşəsinin sənətkarıdır desək, yanılmarıq. Qapı və pəncərə, eləcə də digər mebelləri sifarişlə hazırlayan Emin usta istifadə etdiyi taxtalardan artıq qalan tullatıları zibilliyə atmır. Əksinə, atılan taxtaları toplayır.

Dülgərlik sənəti Emin İsmayılova atasından miras qalıb. Emin usta deyir ki, tulantı taxtalardan sifarişə uyğun istənilən əl işləri və fiqurlar hazırlaya bilər. Dülgərin sözlərinə görə, o, hazırladığı əl işlərindən bir neçəsini satıb. Hazırda usta tullantı taxta parçalarından nəhəng gəmi hazırlayır.

Qəhrəmanımız deyir ki, təqribən iki il müddətinə hazırlanacaq əl işi böyük marağa səbəb olacaq.

Mənbə: Oxu.az