Tovuz döyüşləri yenidən başlayır? - AÇIQLAMA

Erməni ordusu Ermənistan-Azərbaycan dövlət sərhədinin Tovuz rayonu istiqamətində növbəti təxribata əl atıb. Nəticədə də Azərbaycan Ordusunun kiçik çavuşu Elşən Əli Oğlu Məmmədov şəhid olub.

Ens.az xəbər verir ki, bununla bağlı Sonxeber.az-a danışan deputat İqbal Məmmədov bildirib ki, Ermənistan dövləti təxribatlarından əl çəkmək istəmir, işğalçı siyasətini davam etdirir:

"Düşmənin bu gün Ermənistan-Azərbaycan dövlət sərhədinin Tovuz rayonu istiqamətində növbəti təxribatı bunun bariz sübutudur. Qeyd edim ki, bu təxribat gözləniləndir. Çünki ermənilərin işğal olunmuş ərazilərimizə terrorçu qruplaşmalarını toplaması onların müharibəyə hazırlaşdıqlarının göstəricisi idi. Təəssüf ki, beynəlxalq təşkilatlar hələ də ermənilərin işğalçı siyasətini davam etdirməsinə susur. Bu da onların apardıqları ikili münasibətin bariz nümunəsidir".

Deputat qeyd edib ki, ermənilərin bu təxribatlarının arxasında əslində qorxuları dayanır:

"Yəni ermənilərin Azərbaycan ordusundan qorxması heç kəs üçün sirr deyil. Əslində Nikol Paşinyan bu təxribatları ilə "güc şousu" göstərərək hakimiyyətinin ömrünü uzatmağa çalşır. Çünki yaxşı bilir ki, ölkə daxilindəki iqtisadi, siyasi, sosial böhran tezliklə erməni xalqının yenidən ayağa qalxmasına və dövlət çevrilişinə səbəb olacaq. Məhz ona görə də Paşinyan erməni vətəndaşlarının fikirlərini cəbhə bölgəsinə yönəltmək üçün Dağlıq Qarabağ "kart"ından istifadə edir. Əslində danışıqların uzanması və status-kvonun saxlanılması Ermənitan rəhbərliyinə sərf edir. Çünki mövcud vəziyyətdən onlar ölkədaxili problemlərdən insanların fikirini yayındırmaq üçün istifadə edirlər.

Ermənistanın törətdiyi hər bir təxribatın cavabı Azərbaycan ordusu tərəfindən sərt şəkildə verilməkdədir. Bu gün ermənilər onlara silah daşıyanlara və himayə edənlərə arxayın olaraq bu təxribatçı addımları atırlar. Lakin Ermənistan rəhbərliyi unudur ki, bu təxribatçı addımlarla onlar öz sonlarını gətirirlər. Çünki bu gün Azərbaycan dövləti və ordusu 90-cı illərin əvvələrində olduğu kimi gücsüz və sahibsiz deyil. Bu, Azərbaycan dövlətinin və ordusunun cənab İlham Əliyev kimi dövlət başçısı və Ali Baş Komandanı var. Düşünürəm ki, ermənilərin Tovuz istiqamətində davam etdirdiyi təxribatlar növbəti Tovuz döyüşlərinə səbəb olacaq. Nəticədə də Ermənistan ordusu növbəti biabırçı məğlubiyyətini yaşayacaq. Hazırda ermənilər onları himayə edənlərin arxasında gizlənərək öz aləmində müharibə oyununu oynayırlar. Lakin onlar unudurlar ki, bu müharibə oyunu Ermənistanın dövlət kimi xəritədən silinməsinə səbəb ola bilər".