TƏBİB sədri ölkədə koronavirusa nəzarətdən danışdı: “Əgər bu tədbirlər vaxtında görülməsəydi...”

“Həyata keçirdiyimiz məqsədyönlü karantin tədbirləri nəticəsində epidemioloji vəziyyətə nəzarət edə bilirik. Əgər bu tədbirlər vaxtında görülməsəydi, biz səfərbər olmasaydıq, bütün həkimlər ordusu, təcili yardım xidməti səfərbər olmasaydı, bu gün vəziyyəti idarə edə bilməzdik”.

Bunu TƏBİB-in İdarə Heyətinin sədri Ramin Bayramlı AzTV-də “Hədəf” verilişində dilə gətirib.

Onun sözlərinə görə, Azərbaycanda vəziyyət qonşu ölkələrdən fərqlidir:

“Qonşu Cənubi Qafqaz ölkələrindən fərqli olaraq, bizim əhalimiz çoxdur, dünya ilə iqtisadi, turizm əlaqələrimiz genişdir. Ona görə bizim riskimiz o ölkələrdən dəfələrlə artıqdır.

Yoluxma halları artıq daxildən çıxırsa, regionlarda baş verirsə, bu, bizim üçün ciddi həyəcan siqnalıdır. Bizim A, B, C, D, E planlarımız vardı. İstəyirik ki, bütün planlarımızı indidən hazırlayaq ki, heç bir problemlə üzləşməyək, müalicə müəssisələrimizin resursları buna yetsin.

Ən inkişaf etmiş dövlətlərin belə səhiyyəsi COVID-19 qarşısında iflic vəziyyətdə qalıb. Artıq çox ağır vəziyyətdə olanları qəbul etmək istəmirlər, xəstələri çeşidləyiblər. Onları taleyin axarına buraxıblar.

Biz istəmirik ki, heç bir Azərbaycan vətəndaşını taleyin ümidinə buraxaq.

Biz regionlardakı tibb müəssisələrinin resurslarının yetməyəcəyini göz önünə alaraq, indidən tədbirlər görürük”.