Seyid Əzim Şirvani - Oğluma nəsihət (Cəfər, ey xəstə cismimin cani)

Seyid Əzim Şirvani - Oğluma nəsihət (Cəfər, ey xəstə cismimin cani)

Cəfər, ey xəstə cismimin cani, 
Səd ya nəhs olan günü tani. 
Səd o gündür ki, kam ola hasil, 
Olasan öz muraduva vasil. 
Nəhs o gündür ki, qismətin qəmdir, 
Sənə ol aşiri-məhərrəmdir. 
Birinə nəhs olan gün, ey dana, 
Birinə səd olur, deyil bu həba. 
Belədir karü bari-cümlə cahan, 
Birinə sud olur, birinə ziyan. 
Birinə bir zaman olur xürrəm, 
Birinə ol zaman olur matəm. 
Kim ki, bir qəmdə əhli-matəmdir, 
Eydi-novruz ona məərrəmdir.