Şair Məmmədhüseyn - Deyəllər
Səxavətdə Hatəm, cəngidə Rüstəm,
Ədalətdə Nuşirəvanı deyəllər.
Dəryadan bac alan səddi-İsgəndər,
Hər hikmətdə Süleymanı deyəllər.
Gecə-gündüz qaldım dadü fəryadda,
Ya Ağam, sən məni qoymaynan odda.
Səxavətdə, sücaətdə, qeyrətdə,
Şiri-Yazdan Mürtəzanı deyəllər.
Mürtəza dəstindən badə yetişər,
Onu içən hər murada yetişər.
Yoməl-Ərəstidə dada yetişər,
Məhəmməd Əl-Mustafanı deyəllər.
Leyli-nahar çağırdığım ərənlər,
Əşqin badəsini dolu verənlər.
Qohum-qardaş dost müsayib bilənlər,
Bir gün Məmmədhüseyn hanı deyəllər.
Məqaləni bəyəndiniz? Sosial şəbəkələrdə izləyin!
Şərhlər
Şərhləri göstər Şərhləri gizlət