Şadlıq evləri maliyyə sanksiyasından yayınmağın yolunu tapdılar

2020-ci ildən şadlıq evlərinin fəaliyyətini təmin etmək məqsədilə cəlb olunan ofisiantlar tərəfindən "Sadələşdirilmiş vergi üzrə sabit məbləğin və məcburi dövlət sosial sığorta haqqının ödənilməsi haqqında qəbz" alınmazsa, onların işə cəlb edilməsinə görə maliyyə sanksiyası tətbiq edilə bilər.

Vergi Məcəlləsində 1 yanvar 2020-ci il tarixdən edilmiş dəyişikliyə əsasən, iaşə obyektlərində müştərilərə xidmət göstərən fiziki şəxslərlə (ofisiantlarla) əmək müqaviləsi bağlandığı hallar istisna olmaqla, həmin şəxslərin fəaliyyətə başlayanadək "Sadələşdirilmiş vergi üzrə sabit məbləğin və məcburi dövlət sosial sığorta haqqının ödənilməsi haqqında qəbz" əldə edilmədən işlərin yerinə yetirilməsinə cəlb olunmasına görə işəgötürənə (vergi orqanında uçotda olan sifarişçiyə) hər bir belə şəxs üzrə təqvim ili ərzində belə hala birinci dəfə yol verildikdə 2.000 manat, ikinci dəfə yol verildikdə 4.000 manat, üç və daha çox dəfə yol verildikdə 6.000 manat məbləğində maliyyə sanksiyası tətbiq edilir.

Tutaq ki, şadlıq sarayı bir toyun keçirilməsinə qəbzi olmayan 10 ofisiantı cəlb edilib. Əgər vergi orqanı bu faktı aşkar edərsə şadlıq sarayının sahibinə 20 min manat maliyyə sanksiyası tətbiq edə bilər.

Beləliklə, iaşə obyektlərində müştərilərə xidmət göstərən fiziki şəxslər (ofisiantlar) ilə əmək müqaviləsi bağlanmadıqda həmin şəxslər yalnız "Sadələşdirilmiş vergi üzrə sabit məbləğin və məcburi dövlət sosial sığorta haqqının ödənilməsi haqqında qəbz" olduğu halda işlərin yerinə yetirilməsinə cəlb edilməlidir.

Belə şəxslərin müvafiq qəbz olmadan işlərin yerinə yetirilməsinə cəlb edilməsi vergi orqanında uçotda olan sifarişçiyə münasibətdə maliyyə sanksiyasının tətbiqinə əsas yaradır.

“Marja”nın əldə etdiyi məlumata görə, şadlıq evlərinin sahibləri müqaviləsiz və ya qəzb almamış ofsiantları işə cəlb etməyin yolunu müəyyən ediblər. Vergi orqanlarının şadlıq evlərinə sanksiya tətbiq etməsi çətin olacaqdır.

Belə ki, şadlıq evi bir toyun keçirilməsi üçün toy sahibinə (vergidə uçotda olmayan sifarişçiyə) icarəyə verilir. Şadlıq evi ilə toy sahibi arasında icarə müqaviləsi bağlanılır. Şadlıq evini bir günlük icarəyə götürən toy sahibi ofisiantları, aşbazları, musiqiçiləri də özü cəlb edir. “Cəlb edir” dedikdə, əksər hallarda həmin şəxslər şadlıq evi ilə əməkdaşlıq edən ofisiantlar, aşbazlar və musiqiçilər olurlar. Danışığa və icarə müqaviləsinə əsasən, onlar şadlıq evi tərəfindən deyil, toy sahibi tərəfindən işə cəlb edilirlər. Toy sahibi vergi ödəyicisi deyil, vətəndaşın bir toya görə VÖEN alması da düzgün olmaz. Vergi işçiləri yoxlama apararaq qəbz almayan ofisiantların işə cəlb edildiyini müəyyən etdikdə şadlıq evinə sanksiya tətbiq edə bilməyəcək. Bu zaman şadlıq evləri icarə müqaviləsini vergi işçilərinə təqdim edəcək və ofisiantların işə icarədar tərəfindən cəlb edildiyini bildirəcəklər. Toy sahibi isə vergi ödəyicisi olmadığından, yəni uçotda olan sifarişçi olmadığından onu məsuliyyətə cəlb etmək mümkün deyil. Beləliklə, vergi orqanı sadələşdirilmiş vergi üzrə sabit məbləğ və məcburi dövlət sosial sığorta haqq üzrə hədəflərinə nail olmaya bilər.

Qeyd edək ki, xüsusilə rayonlarda, şadlıq evlərinin toy sahibinə icarə verilməsi təcrübəsi çoxdan mövcuddur. Əksər toy sahibi lazım olan qidaları özü alır, aşbazları, ofisiantları və musiqiçiləri özü cəlb edir. İndi bu təcrübə kağız üzərində bütün Azərbaycandakı şadlıq evlərinə lazım ola bilər.