Pulsuz təhsil, avtobus, yemək, ekskursiyalar... - Azərbaycan bu siyahıda yoxdur

“Finlandiyada təhsil pulsuzdur. Yemək, ekskursiyalar, məktəbə aid hər şey pulsuzdur”. 

“Yeni Sabah” xəbər verir ki, bunu təhsil eksperti Kamran Əsədov bildirib. O, sözlərinə belə davam edib:

Çox maraqlı təhsil sistemləri var:

1. VII sinifə qədər qiymətləndirmə şifahidir. Öz qiymətini ancaq məktəbli bilir. Bu onu dostları arasında əskilməkdən qurtarır.

2. Fin məktəblərində parta arxasında əyləşmək məcburiyyəti yoxdur. Dərs vaxtı kreslo, divanda əyləşmək, xalçanın üstünə uzanmaq mümkündür.

3. Fin müəllimlərinin fikrinə əsasən, uşaqlar istirahət etməli, valideynləri ilə vaxt keçirməlidirlər. Bu səbəbdən ev tapşırıqları çox az verilir və onu həll etmək üçün cüzi vaxt lazım olur.

4.Fin məktəblərində isə hər 45 dəqiqədən bir 15 dəqiqə fasilə (tənəffüs) verilir.

5. Finlandiyada valideynlər evə yaxın məktəbi seçirlər. Bu ölkədə elit məktəb anlayışı yoxdur. Bütün tədris ocaqlarının səviyyəsi eynidir.

6. Müəllimin illik maaşı 30 min avroya qədər işlədiyi iş saatına görə dəyişilir.

7. Fin təhsil sistemində birinci hədəf uşaqlara məktəbi sevdirməkdir, bunun üçün pulsuz yemək, dondurmalar verilir, oyunlar, yürüşlər təşkil olunur. Şagirdlərə məktəbdə gecələmək icazəsi belə verilir.

“Economist Intelligence Unit” agentliyinin “Pearson” mediaholdinqi üçün tərtib etdiyi reytinqə əsasən Finlandiyanın təhsil sistemi dünyada ən güclü sistemlərdən biri kimi tanınıb. Reytinqdə 2-ci yeri Cənubi Koreya, 3-cü yeri isə Honkonq tutmuşdur. Yaponiya və Sinqapur isə müvafiq olaraq 4-cü və 5-ci yerləri bölüşdürürlər. Rusiya 20-ci, ABŞ isə 17-ci yeri tutub. Azərbaycanın adı siyahıda yoxdur”.