“Paşinyanın arvadının sülh çağırışını səmimi qəbul etmirik”

Deputatlar Paşinyanın həyat yoldaşının bu günlərdə bir qrup qadının Azərbaycanın işğal olunmuş ərazisinə səfərini təşkil etməsinə və “sülh çağırışları” cəhdinə kəskin etirazlarını bildiriblər. 

“Qafqazinfo” xəbər verir ki, deputat Zahid Oruc parlamentdə çıxışında deyib ki, erməni qadınları tərəfindən indiyə qədər sülhə doğru addımları və çağırışlarını görməmişik: “Əksinə, hər zaman sülhə qarşı çıxıblar. Erməni anaları məktəblərdə uşaqlarına barmaqları ilə azərbaycanlıları düşmən kimi göstəriblər. Xüsusilə də şəhidləri. Amma özlərinin övladı öləndə onları qəhrəman kimi təqdim ediblər. Odur ki, Paşinyanın arvadının və ona dəstək verənlərin sülhə çağırışlarını heç bir halda səmimi qəbul etmirik. Əslində bunu istismar kimi qəbul edirik. Onlar Silva Kaputikyanların, Əlixanyan-Bonerlərin davamçılardır və onlardan da  nəsə gözləməyə dəyməz”.

Deputat Sevinc Hüseynova qeyd edib ki, “Qadınlar sülh naminə “ adı altında Azərbaycanın işğal altında olan Dağlıq Qarabağ ərazisinə səfər edən Rusiya Dövlət Dumasının deputatı Svetlana Jurova bilməlidir ki, Xocalıda qətlə yetirilən insanlar arasında 106 qadın olub. Ümumiyyətlə, Qarabağ münaqişəsi nəticəsində təkcə azərbaycanlılar deyil, eyni zamanda rus millətindən olan gənclər qətlə yetirilib. Bununla da erməni təcavüzü nəticəsində onlarla rus anası gözü yaşlı qalıb. Biz sülhün tərəfdarıyıq və belə səfərlər də sülhə mane olur. Xüsusən də münaqişənin həlli ilə bağlı yaradılan ATƏT MQ həmsədr ölkələrdən biri olan Rusiyanın parlamentinin nümayəndəsinin Azərbaycanın işğal altında olan torpaqlarına qanunsuz səfərləri münaqişənin həllinə mənfi təsir edir. Odur ki, mən belə şəxslərin işğal altında olan torpaqlarına qanunsuz səfərlərdən çəkinməyə çağırıram”.

Parlamentin Azərbaycan-Rusiya parlamentlərarası dostluq qrupunun rəhbəri, deputat Əli Hüseynli isə qeyd edib ki, rus deputatın Dağlıq Qarabağa qanunsuz səfəri ilə bağlı həm öz adından, həm də “Rus İcması” nın adından Rusiya Dumasına kəskin bəyanat göndəriləcək: “Ayrı vaxt olsaydı, buna ciddi əhəmiyyət verməzdik. Amma həmin xanım Rusiya dumasının önəmli adamlarındandır və hakim partiyasının üzvlərindədir. Onun addımı iki ölkənin münasibətlərinin ruhuna tamamilə ziddir”.

Ə. Hüsyenli həmçinin rus dilində tədrisin artması ilə deputat həmkarının fikrinə münasibət bildirib: “Biz  gənclərin dil seçiminə müdaxilə etməməliyik. Onlar bu məsələdə azaddırlar. İstədikləri dili öyrənə bilərlər”.