Ombudsman BQXK nümayəndəsi ilə Suriyadakı azərbaycanlıların vəziyyətini müzakirə edib

Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva Beynəlxalq Qırmızı Xaç Komitəsinin (BQXK) Azərbaycan Nümayəndəliyinin rəhbəri Elena Aymone Sessera və müdafiə üzrə koordinator Emanuela Bertingi ilə görüş keçirib.

Ombudsman Aparatından Trend-ə bildirilib ki, Nazirlər Kabineti yanında Operativ qərargahın tövsiyələrinə uyğun olaraq, internet resurslarının imkanlarından istifadə edilməklə videogörüntü qaydasında baş tutan görüşün məqsədi hazırda Suriya Ərəb Respublikasının ərazisində əsir və girov kimi saxlanılan Azərbaycan vətəndaşlarının mövcud vəziyyətinin və onların geri qaytarılması ilə bağlı tədbirlərin həyata keçirilməsi üzrə qarşılıqlı əməkdaşlığın müzakirəsindən ibarət olub.

İnsan hüquqları üzrə Müvəkkil ötən illərdə Suriyada davam etməkdə olan vətəndaş müharibəsində iştirak etmək üçün bəzi vətəndaşlarımızın ailələri ilə birlikdə həmin ölkəyə getdiklərini bildirib, hazırda müxtəlif silahlı dəstələrin nəzarətində olan çadır düşərgələrində əsir və girova çevrilmiş insanların, xüsusilə qadın və uşaqların dözülməz şəraitdə saxlanıldıqlarını, yaralı və xəstələrin tibbi yardımdan kənarda, baxımsız vəziyyətdə qaldıqlarını vurğulayıb.

Həmin şəxslərin yaxın qohumlarından və ailə üzvlərindən çoxsaylı müraciətlər aldığını, həmçinin onları bir neçə dəfə şəxsən qəbul etdiyini qeyd edən Səbinə Əliyeva müvafiq düşərgələrdə olan uşaqların silahlı dəstələr tərəfindən işgəncələrə məruz qaldıqlarını, bəzi uşaqların ailələrindən zorla alındıqlarını və ya qaçırıldıqlarını həmsöhbətlərinin diqqətinə çatdırıb.

Azərbaycan Nümayəndəliyinin rəhbəri Elena Aymone Sessera Ombudsman təsisatı ilə əməkdaşlığa böyük önəm verdiklərini, qeyd edilən məsələlərin diqqətdə saxlanıldığını, bu sahədə fəaliyyətin əlaqəli şəkildə davam etdiriləcəyini, Suriya düşərgələrində saxlanılan şəxslərin, xüsusilə uşaqların hüquqlarının müdafiəsinə xüsusi diqqət ayrılacağını bildirib.

BQXK-nin müdafiə üzrə koordinatoru Emanuela Bertingi isə öz növbəsində Suriyadakı saxlanma yerlərində başçəkmələr aparıldığını, dünyanı cənginə alan koronavirus epidemiyasının ümumi fəaliyyətdə bir sıra çətinliklər yaratdığını, bununla belə, problemin həlli istiqamətində koordinasiyalı şəkildə çalışacaqlarını qeyd edib.

Videogörüşdə Ombudsman Səbinə Əliyeva bu düşərgələrdə vəziyyətin humanitar fəlakət və insan həyatı üçün təhlükəli səviyyədə olduğunu bildirərək, Beynəlxalq Qırmızı Xaç Komitəsinin mandatı çərçivəsində Cenevrə Konvensiyalarına uyğun olaraq təxirəsalınmaz tədbirlər görülməsini, o cümlədən Suriyadakı silahlı münaqişənin girovuna çevrilmiş vətəndaşlarımızın maraqlarının müdafiəsində, onlar barədə məlumatların dəqiqləşdirilməsində, bu şəxslərin işgəncəyə və qeyri-insani rəftara məruz qalmalarının qarşısının alınmasında, eyni zamanda onlara humanitar dəstəyin, yaralı və xəstələrə isə tibbi yardımın göstərilməsində, həmçinin Azərbaycana qaytarılmalarında və ailələrinə qovuşmalarında köməklik göstərilməsini xahiş etmişdir.

Elena Aymone Sessera faydalı fikir mübadiləsinə və müzakirələrə görə Ombudsmana minnətdarlığını bildirib, qaldırılan məsələlərin əməkdaşlıq çərçivəsində nəzərə alınacağını qeyd edib.