'Neftçi'nin baş məşqçisi: “Qarabağ”ın nəticələrinə fikir vermirik'

Azərbaycan Premyer Liqasının XX turunda "Sabah"ı 4:0 hesabı ilə yendikləri oyundan sonra “Neftçi”nin baş məşqçisi Füzuli Məmmədov mətbuat konfransı keçirib. "Report"un məlumatına görə, gənc mütəxəssis əvvəlcə görüş barədə fikirlərini bildirib...

- Hesab deməsin ki, asan oyun oldu. Çətin matç idi. Əsas da ilk hissədə ağır oldu. Bu cür futbolu gözləyirdik. Uşaqlar tapşırıqları maksimum yetinə yetirməyə çalışdılar. Güclü, keyfiyyətli komandaya qarşı oynadıq. Futbolçular müksimum yaxşı oynadılar. Keçən matç da pis çıxış etməmişdik. Sırf qolları vura bilmədik deyə xal itirdik. Belə olanda rəqib toparlanır və bir səhvdən top buraxa bilirsən. Bu gün azarkeşlərimizi sevindirmək istəyirdik. Uşaqlara belə oyuna görə təşəkkür edirəm. Çox ciddi hazırlaşmışdıq, həftəboyu bunu görürdüm. Həmişə ciddi hazırlaşırıq. Ancaq qol olmayanda təzyiq artır. Ötən oyun bunun ağrısını yaşadıq.

- “Neftçi”nin nəticələri gözlə görüləcək dərəcədə yaxşılaşıb. Komandadaxili bütün narazılıq və narahatlıqlar həll olunubmu?
- Baş məşqçi kimi futbolçuların inamını, onların performansını çox bəyənirəm. Günü-gündən yaxşılaşırıq. Komanda daxilində heç bir problem yoxdur. Bəzən gərginlik olur. Ancaq bu, ab-havanın pis olması demək deyil. Gərginlik, atmosferin pis olması deyə bir şey yoxdur. Bütün futbolçular məşqçilərin tapşırıqlarını sevərək yerinə yetirirlər.

- Aqil Məmmədovun durumu necədi?
- Onun yanında idim. Durumu stabildir. Həkimlər dedilər ki, həyəcandan sıxıntı olub. Hər şey normaldı. Aqil evlərinə yollandı. Həkim müayinəsindən sonra hər şeyi dəqiqliyi ilə biləcəyik. Qorxulu bir şey yoxdur.

- 4 qol vurdunuz, amma tribunalarda susqunluq var idi...
- Azarkeşlər, “Forza Neftçi” bizi sonadək dəstəklədi. Onlara təşəkkür edirəm.

- Hər dəfə qələbələrdən sonra kapitan Emin Mahmudov komandanı azarkeşlərin yanına aparırdı...
- Bu haqda çox danışmışıq. Kapitan özü olmasa da, komandanı ora yolladı. Biz azarkeşlərimizə təşəkkür etdik.

“Neftçi”nin mətbuat xidmətinin rəhbəri Rüstəm Allahverdiyev: "Azarkeşlər arasında heç bir problemimiz yoxdur. Emin şəxsən “Forza Neftçi”ilə görüşüb, onlar məşqə gəlmişdilər. Mahmudovun getməməsi ilə bağlı azarkeşlərə deyilib. “Forza Neftçi” deyib ki, siz qalib gəlin, yanımıza gəlməsəniz də, olar. Eminlə azarkeş arasında şəxsi məsələ idi və qaydasına qoyulub".

- Ötən tur sizdən əvvəl “Qarabağ” xal itirmişdi və bunu bilərək meydana çıxmışdınız. Onların nəticələri sizə nə dərəcədə təsir edir?
- Heç bir şablon cavab verməyəcəyəm. “Qarabağ”ın nəticələrinə fikir vermirik. Keçən turdakı oyuna baxandan sonra uşaqlara deməyə söz tapmırdım. Səhvlər var idi, amma sonlara doğru idi. Ani diqqəsizlik olmuşdu. Komandanın “boşalması” ilə əlaqəsi yox idi. Qol futbolda ən vacib şeydir, rəqibi plandan çıxarır. Sevinirəm ki, qol epizodları yaradırıq, amma sonluğu da qoymaq lazımdır. Oyun olduğu zaman nəticə də olacaq. Hazırda çalışdığım məsələ komandanın həm hücumda, həm müdafiədə düzgün oynamasıdır. İrəli xətdə keyfiyyətli futbolçularımız var. Amma topu vura bilməyəndə belə hallar yaşanır.

- Keçən turdan sonra qapı xəttində dəyişiklik etməyi düşünürdünüz?
- 92-ci dəqiqədə qapıçının səhvi var idi. Onu analiz etdik. Aqil Məmmədovla danışmışdıq. Aqil bu oyuna çox yaxşı hazırlaşmışdı. U-21 millisinin qapıçısı da bizdədir. Bütün qapıçılarımız keyfiyyətlidir. Bir səhvə görə futbolçunu silə bilmərik. Bu gün də göstərdik ki, futbolçularımızın arxasındayıq.

- Aqil Məmmədov milliyə namizədlər siyahısındadır. Bunu milliyə futbolçu qazandırmaq mənasında fəaliyyətiniz olduğunu düşünürsünüz?
- Milliyə oyunçu verdikdə çox sevinirik. Namik Ələskərov da əsas heyət üzvünə çevrilib. İmkan olduğu qədər bunu etməyə çalışırıq. Milli bizimdir, yığmaya xeyrimizin dəyməsini istəyirik. Aqilə görə də sevinirik.