Molla Pənah Vaqif - Bax

Molla Pənah Vaqif - Bax

Ey Vidadi,gərdişi-dövrani-kəcrəftarə bax! 
Ruzigarə qıl tamaşa,karə bax,kirdarə bax!

Əhli-zülmü necə bərbad eylədi bir ləhzədə, 
Hökmü adil padişahi-qadirü qəhharə bax!

Sübh söndü,şəb ki,xəlqə qiblə idi bir çıraq, 
Gecəki iqbalı gör,gündüzdəki idbarə bax!

Taci-zərdən ta ki ayrıldı dimaği-pürqürur, 
Payimal oldu təpiklərdə səri-sərdarə bax! 

Mən fəqirə əmr qılmışdı siyasət etməyə, 
Saxlayan məzlumu zalimdən o dəm Qəffarə bax!

Qurtaran əndişən ahəngəri-biçarəni,
Şah üçün ol midbəri təbdil olan mismarə bax!

İbrət et Ağa Məhəmməd xandan,ey kəmtər gəda, 
Ta həyatın var ikən nə şahə,xunxarə bax!

Baş götür bu əhli-dünyadan ayaq tutduqca qaç, 
Nə qıza,nə oğula,nə dustə,nə yarə bax!

Vaqifa,göz yum cahanın baxma xubü ziştinə, 
Üz çevir ali-əbayə,Əhmədi-Muxtarə bax!