Mikayıl Müşfiqin abidəsi aşırıldı

Mikayıl Müşfiqin abidəsi aşırıldı

Qaradağ Rayon İcra Hakimiyyəti Mikayıl Müşfiqin Müşfiqabad qəsəbəsindəki abidəsinin aşırılmasına münasibət bildirib.

İH-nin ictimai siyasi və humanitar məsələlər şöbəsinin müdiri Munis Bayramov Oxu.Az-a açıqlamasında bildirib ki, Mikayıl Müşfiqin Müşfiqabad qəsəbəsindəki abidəsi və ətrafı yararsız vəziyyətdə idi:

“Ərazidə abadlıq işləri aparılıb və yeni mərmərdən abidə hazırlanıb. Çıxarılan abidə sovet dövründə gipsdən hazırlanıb. O, Mikayıl Müşfiqin şəxsiyyətinə, şairliyinə yaraşmayan abidə idi. Hər dəfə ağardılırdı və görkəmi də ona oxşamırdı”.

“Dünən Mikayıl Müşfiqin mərmərdən yeni abidəsi köhnə abidənin yerinə qoyulub”, - deyə şöbə müdiri qeyd edib.

Qeyd edək ki, Mikayıl Müşfiqin Qaradağ rayonu ərazisindəki büstü traktorla aşırılıb. Həmin görüntülər sosial şəbəkədə narazılığa səbəb olub.

İlhamə Əbülfət