Formula 2 pilotu “Haas”ın sınaq yürüşlərində iştirak edəcək

Formula 2 pilotu “Haas”ın sınaq yürüşlərində iştirak edəcək

İsveçrəli pilot Lui Deletraz “Haas” komandasının noyabrın 28-də Əbu-Dabidə keçiriləcək sınaq yürüşlərində iştirak edəcək. SİA-nın məlumatına görə, isveçrəli pilot karyerasında ilk dəfə olaraq Formula 1 bolidinin sükanı arxasına keçəcək. 21 yaşlı cenevrəli sınaqların ikinci günündə trasa çıxacaq. Sınaq yürüşlərinin məqsədi “Pirelli” şirkətinin istehsal etdiyi şinlərin keyfiyyətini yoxlamaqdır.

Deletraz “Charouz Racing System” komandasında çıxış edən Formula 2 pilotudur. O, bu mövsümdə artıq iki dəfə podiuma qalxmağa müvəffəq olub.

“Haas” komandasının mətbuat xidmətinin məlumatında isveçrəli pilotun sözləri sitat gətirilib: “Əbu-Dabidə Formula 1 sınaqlarında debütümü səbirsizliklə gözləyirəm. Mənə verilən imkana görə komandanın rəhbərliyinə minnətdaram. Cari mövsümün sonu əla oldu və mən buna sevinirəm”.