Elşən İsmayıl - Yağ, ey yağış...

Yağ, ey yağış,

Ömrümə, günümə,

Həyatıma yağ,

Həyatdan ayrılan dünümə yağ,

Bu günümə, sabahıma,

Yağ sən bütün günahıma...

Yağ, yu apar

Sel su kimi,

Həyatımın hər şeyini

Təmizlə sən çirkabından,

Yalanından, böhtanından...

Yağ, ey yağış,

Sən yağ ki, mən

Ayrılmayım sevdiyimdən,

Xatırlayım narin-narin

 Damcıların kimi,

Özləyim, özləyim sevdiyimi...

Yağ, yağışım, yağ qəlbimə,

Yağ sevgimə,

Sən yağ mənə,

Arzularıma, diləyimə,

Yağ ki, eşqim heç solmasın,

Ürəyim daim onu,

Onu arzulasın,

Yağ, yağışım yağ...

Yağ, ey yağış,

Yağ, quru səhra kimi

Quruyan boğazıma,

Avazıma,

Sən yağ, melodiyama

Bir ruh ol,

Dol ciyərlərimə,

Soyuqdan sızlayan bənizimə,

Bəlkə isindim sənin damcılarınla,

Yaşayıram arzularınla,

İstəyinlə,

Kövrəlirəm qəminlə,

Sən yağdıqca

Xatırlayıram keçmişimi,

Dünənimi, bütün ömrümü.

Sən yağ ki,

Üstümdəki torpaq kimi

Yuyulsun bütün kinim,

Nifrətim yox olsun,

Ürəyim yalnız sənin

Eşqinlə dolsun...

Yağ, yağışım,

Salam desin payız mənə,

Məktub yazsın gözəl qışım,

Yağ, səmadan ta mənədək,

Gözlərimdən, sinəmədək,

Yağ,

Ürəyim açsın çiçək...

Yağ, yağışım,

Arzum səni,

Könlüm səni

Qoy istəsin,

Fikrim-zikrim səni desin,

Yağ, yağışım,

Sevgim buludlara qovuşsun,

Diləklərim gerçək olsun,

Mələklərim körpə doğsun

Şirin-şirin xəyal kimi,

Sən eşqimin yelkəni,

Dəryalarda üzən təknə kimi...

Yağ,

Bu eldən Tanrıyadək,

Yağ,

Səninlə qonaq gedim,

Arzuların limanında

Mən yarimlə görüşüm,

Öpüşüm, sevişim qoy

Doyunca,

Səndən mənə bir oyuncaq

Göndərən mələk kimi,

Yağ, qırım mən bu tilsimi,

 Bir sehrlə sənlə olum,

Yağ,

Üstümdəki torpaq kimi

Yuyulsun bütün kinim,

Nifrətim yox olsun,

Ürəyim yalnız sənin

Eşqinlə dolsun...

Yağ, yağışım, yağ...

ELŞƏN İSMAYIL

Yağmurlu bir sentyabr gecəsindən xatirə...