Elmar Məmmədyarov Serbiyanın xarici işlər naziri ilə görüşüb

Xarici İşlər naziri Elmar Məmmədyarov Bakıda keçirilən Qoşulmama Hərəkatının XVIII Zirvə Görüşü çərçivəsində Serbiya Respublikasının Baş nazirinin birinci müavini, Xarici İşlər naziri İvitsa Daçiç ilə görüşüb. 

XİN-in Mətbuat xidmətindən "Report"a verilən məlumata görə, tərəflər iki ölkə arasında beynəlxalq təşkilatlar çərçivəsində nümayiş etdirilən qarşılıqlı dəstəyin məmnunluq doğurduğunu bildiriblər. 

Bu xüsusda, nazir Elmar Məmmədyarov Ermənistan-Azərbaycan Dağlıq Qarabağ münaqişəsinə toxunaraq münaqişənin Azərbaycanın suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığı prinsipi əsasında tezliklə həllinə dair Serbiyanın prinsipial mövqeyinə görə minnətdarlığını ifadə edib.

Nazirlər iki ölkə arasında qarşılıqlı əməkdaşlığın müxtəlif sahələrdə, xüsusilə də iqtisadi sahədə daha da inkişaf etdirilməsinin əhəmiyyətinə toxunublar. Azərbaycan Respublikası ilə Serbiya arasında iqtisadi əməkdaşlıq üzrə birgə hökumətlərarası komissiyanın fəaliyyəti və biznes forumlarının təşkilinin ikitərəfli əməkdaşlığın zəngin potensialından daha səmərəli şəkildə faydalanmağa əlavə təkan verə biləcəyi vurğulanıb və bu istiqamətdə səylərin artırılacağına dair razılıq əldə olunub.

Nazir İ.Daçiç Azərbaycanın QH-də sədrliyinin uğurlu olacağına və ölkələrimiz arasında ikitərəfli əlaqələrin daha da inkişaf edəcəyinə dair ümidi ifadə edib və nazir Elmar Məmmədyarovu öz ölkəsinə səfər etməyə dəvət edib.

Görüş əsnasında həmçinin qarşılıqlı maraq doğuran digər regional təhlükəsizlik məsələləri ətrafında fikir mübadiləsi aparılıb.