Dövlət Miqrasiya Xidməti yanında İctimai Şura üzvlüyünə boş qalan yerlər üçün təkrar seçki keçirilib

Dövlət Miqrasiya Xidməti (DMX) yanında İctimai Şura üzvlüyünə boş qalan yerlər üçün təkrar seçki keçirilib.

DMX-nin mətbuat xidmətindən AZƏRTAC-a bildiriblər ki, altı namizəd arasında keçirilən seçkidə Kərimova Lamiyə Ağa qızı və Fətullayev Vidadi Bayram oğlu İctimai Şuranın üzvü seçiliblər. Səslər Komissiya üzvlərinin iştirakı ilə müşahidəçilərin nəzarəti altında hesablanıb. Səsvermədə seçici qismində ilkin seçkilər üçün qeydiyyata alınmış vətəndaş cəmiyyəti institutlarının 23 təmsilçisi iştirak edib.

Xatırladaq ki, Dövlət Miqrasiya Xidməti yanında İctimai Şura üzvlüyünə seçki iyunun 25-də keçirilib. Şuranın 9 üzvdən ibarət tərkibdə formalaşdırılması nəzərdə tutulsa da, səsvermənin nəticəsinə görə müvafiq qanunvericiliyin tələbləri əsas götürülməklə 13 namizəddən yalnız 7-si İctimai Şuraya üzv seçilmişdi.

Dövlət Miqrasiya Xidməti yanında İctimai Şura növbəti iki il üçün doqquz nəfərdən ibarət tərkibdə fəaliyyət göstərəcək.