Çavuşoğlu: Türkiyə həmişə Azərbaycanın yanında olacaq

"Azərbaycana qarşı Qərbdən gələn hücumu görürük. Avropa Şurası Parlament Assambleyasında Azərbaycana yönəlik əsassız ittihamların şəxsən şahidi olmuşam".

Publika.az xəbər verir ki, bu sözləri Türkiyə Xarici İşlər naziri Mövlud Çavuşoğlu
"Qlobal medianın inkişaf trendləri: Risklər və İmkanlar" Bakı Beynəlxalq Media Konfransında çıxışı zamanı deyib.

O, Türkiyənin həmişə Azərbaycanın yanında olacağını bildirib: "Türk dünyasının mənfəətləri üçün çətin mübarizə aparmışıq. Haqlı davamıza davam edəcəyik. Dərdimizi, haqlı davamızı dünyaya çatdırmaq üçün birgə əmin addımlarla gələcəyə irəliləməliyik".

""Qlobal medianın inkişaf trendləri: Risklər və İmkanlar" Bakı Beynəlxalq Media Konfransı keçirildiyinə görə haqq və ədalətin yanında olan bütün jurnalistləri təbrik edirəm. Türkiyə və Azərbaycan "bir millət iki dövlət"dir, yaşasın iki ölkənin qardaşlığı. Azərbaycan prezidentinin dediyi kimi bir millətin iki diasporu olmaz. Xaricdə yaşayan vətəndaşlarla gücümüzü birləşdirdik. İki ölkənin Xarici İşlər Nazirliyinin gözəl işbirliyi var. Biz olmayanda başda Azərbaycan Prezidenti İlham Əliyev olmaqla, azərbaycanlı qardaşlarımız Türkiyə və türk millətini müdafiə edir. Azərbaycan olmayanda biz Azərbaycanın haqqını müdafiə edirik. Bu, bizim boynumuzun borcudur", - Türkiyə Xarici İşlər naziri deyib.

Onun sözlərinə görə, dünya sürətlə inkişaf etdiyindən problemlər, dezinformasiyalar da yayılır:

"Digital texnologiya gözəl fürsətlər irəli sürsə də, bəzən təhdidlərlə qarşı-qarşıya qalırıq. Bu məqamda media qarşısında obyektiv şəkildə haqlarımızın müdafiəsi üçün iş düşür. Biz türkdilli ölkələrin qlobal media təşkilatlarının birgə hərəkət etməsini istəyirik, gücümüzü birləşdirməliyik".

Mövlud Çavuşoğlu qeyd edib ki, Qarabağ məsələsinə dünya səssiz qalıb, ikili standartlar tətbiq olunur:

"İllərdir problemin həlli üçün ATƏT-in Minsk qrupu və digər formatların nəticəsi yoxdur. Azərbaycanı haqlı davasında tək qoya bilmərik. Qlobal Jurnalistlər Birliyi də bu dəstəyi göstərməlidir. Bu gün İslam düşmənliyi türk düşmənliyi ilə birləşib. Bunu xüsusən Qərbdə, Avropanın mərkəzində görürük. Siyasətçilər populizmə qapılaraq hamımızı təhdid edən trendlərə qarşı dayana bilmir. Media cəmiyyəti düzgün məlumatlandırmaq baxımından böyük rola malikdir. Bu mənada işbirliyi mütləqdir. Suriyada bölgəni təhdid edən PKK/YPG-yə qarşı mücadilədə belə dezinformasiyanın şahidi olduq. PKK ilə kürdləri eyniləşdirirlər, bu, həqarətdir. Kürd qardaşlarımız öz haqlarından istifadə etmək istəyirlər, onların ideologiyası terror təşkilatından tam ayrıdır. Kürdlərlə PKK-ya eyni münasibət göstərilə bilməz".

Mövlud Çavuşoğlu qeyd edib ki, Fransa başda olmaqla bəzi ölkələr terror dövləti qurmaq istəyirlər:

"Böyük oyunu pozduğumuz üçün narahatdırlar. Terror təşkilatı ilə mübarizə aparırıq, türk millətinin gələcəyi üçün buna məcbur idik. Heç kəs bizə insani mövzuda dərs keçməyə çalışmasın. Çünki biz bu məsələdə olduqca həssasıq. 4 milyon yarım qaçqını ölkəmizdə yer vermişik. YPG ən çox kürd qardaşlarımıza zülm edib, hamısı evinə qayıdacaq, Suriyanın ərazi bütövlüyü təmin olunacaq. Ən çox da onlar sevinəcək. Biz terror təşkilatıını təmizləyənə qədər davam edəcəyik. Sanksiyalar yolu ilə heç kəs nəticə əldə edə bilməz. Səmimi, dürüst olub verdiyiniz sözü tutacaqsınız. ABŞ verdiyi sözü tutmadı, təhlükəsiz bölgə yaratmadığından təktərəfli qaydada hərəkat başlamaq məcburiyyətində qaldıq".