Bu rayonda torpaqların dəqiq balansı və keyfiyyəti bilindi

Əmlak idarəçiliyində unikal layihə olan Torpaqların Elektron Kadastr Uçotu işlərinin nəticələrindən daha bir rayon faydalanır. Artıq Cəlilabad rayonu üzrə əldə edilən məlumatlar real şəraitdə istifadə ediləcək. Komitədən SİA-ya verilən məlumata görə, bu məqsədlə Əmlak Məsələləri Dövlət Komitəsi tərəfindən 17 sentyabr tarixində Cəlilabad rayonunda görülən işlərin nəticələri, sistemin istifadə qaydaları ilə bağlı Regional Forum keçirilib. Tədbirdə komitənin tabeli qurumlarının, aidiyyəti mərkəzi icra hakimiyyəti orqanlarının, bələdiyyələrin, rayon İcra Hakimiyyətinin nümayəndələri iştirak edib. Müəssisə, idarə, təşkilat və media nümayəndələrinin də maraq göstərdiyi ictimai təqdimatda bu layihənin nəticələri, üstünlükləri və gələcək perspektivləri müzakirə olunub. Uçot işlərinin real şəraitdə tətbiqi mexanizmi onlara əyani şəkildə göstərilib, layihənin rayonda torpaqların səmərəli idarəsi və istifadəsinə göstərəcəyi müsbət təsirlər izah edilib.

Bildirilib ki, torpaqların elektron kadastr uçotu informasiya bazasında torpaqların təyinatından tutmuş onun münbitliyinə qədər bütün göstəricilər əks olunur. Cəlilabad rayonunda yekunlaşan bu işlər nəticəsində bütün torpaqların dəqiq sərhədləri, miqyası, istifadə təyinatı müəyyənləşir. Beləliklə, sistem təkcə torpaq mülkiyyətçilərinə yox, bütövlükdə dövlətə və vətəndaşlara, torpaqla bağlı biznes quran insanlara çox böyük fayda verəcək. Dövlət özünün sahibliyində və mülkiyyətində olan torpaqların balansını əldə etmiş olur. Bələdiyyələr təyinatına, mülkiyyət və əmlak növünə görə harada və nə qədər torpaq olduğuna dair bölgü məlumatları əldə edir. Xüsusi mülkiyyət sahibliyi dəqiqləşir, pay torpaqlarının sahəsi dürüstləşdirilir.

Reallaşan uçot işləri Cəlilabad rayonunun bələdiyyə hüdudları daxilində torpaq islahatına cəlb edilmiş 93,9 min hektar torpaq sahəsinin mövcudluğunu öyrənməyə imkan verib. Bəlli olub ki, 26,5 min hektar bələdiyyə, 10,7 min hektar dövlət, 56,7 min hektar özəl torpaqların payına düşür. Bələdiyyə hüdudları daxilindəki torpaq sahələrinin 68,2 min hektara yaxını (72.7%-i) kənd təsərrüfatına yararlı torpaqlardır ki, bunun da 58,6 min hektar hektarını əkin sahələri təşkil edir. Torpaq islahatı aparılan zaman rayon üzrə çoxillik əkmələr 0,54 min hektar olduğu halda, elektron uçot aparılan zaman bu ərazilər digər uqodiyaların hesabına artaraq 1,1 min hektar olub. Uçot işləri zamanı müəyyən edilib ki, torpaq payı almış ailələrdən 28 minə yaxınının torpaq ölçüləri 1 hektaradəkdir. Bu da onu göstərir ki, torpaq sahələrinin konsolidasiyasına, birləşməsinə ehtiyac vardır.

Layihənin reallaşdığı müddət ərzində Cəlilabad rayonunda torpaqların kəmiyyət göstəriciləri ilə bərabər, keyfiyyət göstəricilərinin də uçotu aparılıb. Eləcə də, torpaqların iqtisadi qiymətləndirilməsi və bonitirovkası ilə bağlı məlumat bazası yaradılıb, şorlaşma və şorakətləşmə, eroziya xəritələri tərtib edilib.

Hazırda torpaqların elektron kadastr uçot işlərinin yekunlaşdığı 24 rayonun 11-də bu layihənin praktiki istifadəsi reallaşıb. Qeyd edilməlidir ki, torpaqların elektron kadastr uçotu ümumilikdə 4,2 milyon hektara yaxın ərazini əhatə edəcəkdir. Bu günə qədər 3 milyon hektara yaxın sahənin elektron kadastr uçotu aparılıb.

Təqdimatın sonunda layihənin praktiki nəticələri və istifadəsi ilə bağlı iştirakçıların sualları mütəxəssislər tərəfindən cavablandırıldı.