XİN: Ermənistan hörmətə layiq olduqda tonumuz hörmətcil olacaq

“Ermənistan tərəfinin tarix və demokratiya məsələlərində Azərbaycana hər hansı iddia irəli sürməyə heç bir əsası yoxdur. Bu utanmazlığın və ikiüzlülüyün yüksək həddidir”.

“Report” xəbər verir ki, bu sözləri Xarici İşlər Nazirliyinin Mətbuat xidməti idarəsinin rəisi Leyla Abdullayeva Ermənistanın xarici siyasət idarəsinin Azərbaycana qarşı ittihamlar səsləndirməsinə cavab olaraq deyib.

“Silahlı təcavüz və qanlı etnik təmizləmə həyata keçirərək on illər boyunca Azərbaycanın beynəlxalq səviyyədə tanınmış ərazilərinin beşdə birini işğal altında saxlayan, vicdanında Xocalı qətliamı da daxil olmaqla, on minlərlə mülki şəxsin günahsız ölümü və yüz minlərlə insanın viran edilmiş taleyi olan, öz evlərindən zorla didərgin salınmış insanların doğma torpaqlarına geri qayıtmalarına imkan verməyən bir ölkənin demokratiya və insan hüquqlarından danışmağa nə mənəvi, nə də hüquqi əsası var. Ermənistanın beynəlxalq humanitar hüququn əsas normalarını və çoxsaylı beynəlxalq öhdəliklərini kobud şəkildə pozduğu, BMT Təhlükəsizlik Şurasının məlum qətnamələrinin yerinə yetirilməsinin vacibliyi beynəlxalq ictimaiyyətə yaxşı bəllidir.

Ermənistan XİN-in bizi hörmətcil tonun olmamasında ittiham etməyə cəhd göstərməsinə gəldikdə isə vurğulamaq istərdik ki, qarşı tərəfdə hörmətə layiq olan və ciddi subyekt olduğu təqdirdə tonumuz da hörmətcil olacaq”, - deyə o bildirib.