Ukrayna xaricdən pilotlar dəvət edə bilər

Ukraynanın hakimiyyət orqanları Qərb müttəfiqlərindən ilk F-16 qırıcılarını aldıqdan sonra bu təyyarələri idarə etmək və onlara xidmət göstərmək üçün xarici ölkələrdən pilotlar və texniki işçilər dəvət edə bilər.

Ens.az ikisahil.az-a istinadən xəbər verir ki,bu barədə Ukrayna Ali Radasının nəqliyyat və infrastruktur komitəsinin üzvü Oksana Savçuk milli telemarafonda çıxışı zamanı deyib.

Qeyd edək ki, avqustun 4-də Ukrayna Prezidenti Volodimir Zelenski Qərb müttəfiqlərinin Kiyevə F-16 qırıcılarının ilk partiyasının göndərdiyini təsdiqləyib. Lakin o, təyyarələrin sayını və harada yerləşdirildiyini açıqlamayıb.

Bir müddət öncə isə Böyük Britaniyanın “The Economist” jurnalı Ukraynanın Qərb ölkələrindən 10 ədəd F-16 qırıcısı aldığını və ilin sonunadək onların sayının 20-yə çatdırılacağını yazıb. Nəşr, həmçinin 2025-ci il ərzində Ukraynaya ümumilikdə 79 ədəd F-16 qırıcısı göndəriləcəyini bildirib.

Rusiya Prezidenti Vladimir Putin isə öz növbəsində Kiyevə yeni silahların, o cümlədən F-16 qırıcılarının tədarükünün cəbhədəki vəziyyəti dəyişməyəcəyini, əksinə, müharibənin uzanmasına gətirib çıxaracağını deyib.