TƏBİB-in tabeliyində olan qurum yarım milyon manatlıq cərrahi sap alacaq

Tibbi Ərazi Bölmələrini İdarəetmə Birliyinin (TƏBİB) tabeliyində olan İnnovasiya və Təchizat Mərkəzi cərrahi sapların satın alınmasıyla bağlı "Paşa-K" firması ilə yarım milyon manat dəyərində müqavilə imzalayıb.

Teleqraf.com dövlət satınalmalarının vahid internet portalına istinadən xəbər verir ki, müqavilə əsasında TƏBİB-in tabeliyinə verilən dövlət səhiyyə sisteminə daxil olan tibb müəssisələrində istifadə üçün 196 min 408 ədəd cərrahi sap satın alacaq.

Tenderdə müqavilənin ehtimal olunan qiyməti 1 milyon 374 min 376,85 manat olsa da, tərəflər 571 min 672,76 manata razılaşıblar. Layihənin icra müddəti 2025-ci ilin yanvarın 22-dən başlayaraq mayın 31-nə qədər davam edəcək.

Qeyd edək ki, “Paşa-K” firması hüquqi şəxs kimi 08 fevral 1996-cı il tarixində təsis edilib və Ədliyyə Nazirliyində qeydiyyatdan keçib. Firma dərman preparatlarının və digər tibbi məhsulların topdan satışını həyata keçirmək məqsədi ilə Səhiyyə Nazirliyindən 20.10.2015-ci il tarixində 086503 saylı lisenziya alıb.