TƏBİB-in sədri: “Jurnalistlərin arasında da COVID-19-a yoluxduğunu bilməyənlər ola bilər”

“Yoluxmanın səviyyəsinə iki təməl məsələ təsir edir”.

Ens.az Apa.az-a istinadən xəbər verir ki, bunu bu gün Nazirlər Kabineti yanında Operativ Qərargahın təşkil etdiyi mətbuat konfransında TƏBİB-in İdarə Heyətinin sədri Ramin Bayramlı bildirib.

R. Bayramlı deyib ki, yoluxduğu bilinməyən insanlar yoluxmanın səviyyəsinə təsir göstərir: “Yoluxduğunu bilməyən insanlarla bağlı maska taxılması, sosial məsafənin qorunması əsasdır. İkinci, yoluxmaya, yoluxan insanların küçəyə çıxması təsir edir. Bu insanlar küçəyə çıxmamalıdır”.

TƏBİB-in İdarə Heyətinin sədri qeyd edib ki, son dövrlər jurnalistlər arasında da yoluxma halları qeydə alınır, onlar arasında da yoluxduğunu bilməyənlər ola bilər: “Ona görə də tələblərə riayət etmək əsasdır. Bir məqamı da qeyd edim. Xüsusi rejimli xəstəxanalarda yoluxma azdır. Məsələn, Neftçilər Xəstəxanasında cəmi 7 nəfər yoluxub, onlar da xəstəxanada deyil, kənarda, evlərdə yoluxub”.