Şimali Qafqaz və Azərbaycan kurortları birləşə bilər

Vahid “ski-pass” (*şəxsi məlumatlar və fotodan ibarət fərdi xəritə) Şimali Qafqaz və Azərbaycan kurortlarını birləşdirə bilər.

Oxu.Az TASS-a istinadən xəbər verir ki, bu barədə “Şimali Qafqaz Kurortları” (KSK) şirkətinin baş direktoru Rüstəm Tapayev “İnvestiruy v Kavkaz” biznes-forumununda açıqlama verib.

“Biz Qafqaz sıra dağlarında böyük turizm klaster formalaşdırmaqla məşğuluq. Hazırda  Azərbaycanda fəaliyyət göstərən kurortlarla sıx əməkdaşlıq edirik. Bundan sonra da inkişaf etməyi, vahid təqvim hazırlamağı, turistlərlə qarşılıqlı əlaqə yaratmağı, vahid ski-pass yaratmağı planlaşdırırıq”, - deyə Tapayev bildirib.

Qeyd edək ki, “İnvestiruy v Kavkaz” adlı biznes-forum 6-7 dekabr tarixlərində Qroznıda keçirilir. Tədbirin təşkilatçısı Rusiya Federasiyasının Şimali Qafqaz işlər üzrə Nazirliyi, Rusiyanın TASS agentliyi, Çeçenistan Respublikası hökuməti, KSK və  Şimali Qafqazın İnkişafı Təşkilatıdır.