Səngəçal-Çeyildağ yolunun təmiri yekunlaşır

Azərbaycan Avtomobil Yolları Dövlət Agentliyindən Azvision.az-a verilən məlumata görə, 24 km uzunluğa malik Səngəçal-Çeyildağ avtomobil yolu uzun müddət istismar olunmasına baxmayaraq əsaslı şəkildə təmir olunmayıb. Üstəlik sözügedən yolla ağır tonnajlı yük maşınların hərəkəti yolun əsasında və qara örtüyündə dağılmalara, çökmə və qabarmalara gətirib çıxarıb. Bu isə avtonəqliyyat vasitələrinin hərəkətində problemlərə gətirib çıxarırdı. Məhx bu problemlərin aradan qaldırılması ilə yol boyu 2 qəsəbənin 6 minə yaxın əhalisinin rahat gediş-gəlişini təmin etmək məqsədi ilə Azərbaycan Avtomobil Yolları Dövlət Agentliyi tərəfindən təxirəsalınmaz tədbirlərə start verilmişdir.



Səngəçal-Çeyildağ avtomobil yolu 2 hərəkət zolaqlı olmaqla IV texniki dərəcəyə uyğun inşa edilir. Yolun hərəkət hissəsi 6 metr, çiyinlərin eni isə 2 metr təşkil edir. Yenidənqurma işlərinə uyğun olaraq yol yataının yararsız qruntu qazılaraq çıxarılıb, əks dolğu işləri aparılaraq 52 min kub.mhəcmdə yeni yol yatağı inşa olunub.



Yolun profilə salınması üçün relyefdən aşağı olan hissələr qaldırılıb, hündür hissələr isə aşağı salınıb. Bundan başqa yolun normativ eninin alınması məqsədi ilə torpaq yatağının genişləndirməsi və dağ yamaclarının kəsilməsi işləri də aparılıb. Sadalanan işlərə paralel olaraq 20 sm hündürlükdə yol əsasının alt layı da tikilib. Bunun ardınca is 15 sm hündürlükdə əsasın üst layının tikintisi aparılıb. Əsasın alt və üst layının tikintisi 100 min kub.m-dən artıq həcmdə icra olunub.



Layihə boyu 38 ədəd müxtəlif diametrli suötürücü boru yerləşir. Lakin borular köhnəldiyindən bəzilərinin sökülərək yenidən tikilməsinə, bir hissəsinin isə təmir olunaraq işlək vəziyyətinə salınmasına zərurət yaranmışdır. Bu zəruri borular təmir olunub, köhnə borular sökülərək, yerində müxtəlif diametrli yeni dəmir-beton borular tikilib. Bundan başqa yol boyu yeraltı kommunikasiya xətlərinin yolun altından keçirilməsi üçün keçid borular da atılıb.



Torpaq işləri tam olaraq bitəndən sonra texnoloji ardıcıllığa uyğun olaraq yolun asfaltlanması işlərinə başlanılıb. Əlaqələndirici bitum səpilməklə yola alt və üst lay olmaqla 12 sm qalınlığında yeni asfalt-beton örtüyü döşənir. Asfalt-beton örtüyün eni 7 m nəzərə alınmaqla bu işlər yolun 150 min kv.m-dən çox sahədə aparılır.

Bütün işlər mövcud tikinti və norma qaydalarına uyğun şəkildə yüksək keyfiyyətlə Azərbaycan Avtomobil Yolları Dövlət Agentliyinin rəhbərliyinin birbaşa nəzarəti altında aparılır. İşlərin yaxın aylarda tam olaraq yekunlaşdırılması nəzərdə tutulub.