Səfirlik Türkiyədəki Azərbaycan vətəndaşlarının durumu ilə bağlı məlumat yayıb

SOCAR pandemiya ilə əlaqədar Türkiyədə qalmış minlərlə Azərbaycan vətəndaşına yardım edib.

“Report” xəbər verir ki, bu barədə Azərbaycanın Türkiyədəki səfirliyi məlumat yayıb. 

Məlumatda deyilir: "Dünyanın bir çox ölkələrində, o cümlədən Türkiyədə geniş yayılmış koronavirus infeksiyası (COVID-19) ilə bağlı bu ölkədə həyata keçirilən karantin tədbirləri və hərəkətin məhdudlaşdırılması şəraitində, ölkə rəhbərliyinin tapşırığına əsasən, Türkiyəyə müvəqqəti gəlmiş və hazırda Vətənə dönə bilməyən, bəzi məişət və inzibati zəminli problemlərlə üzləşən Azərbaycan vətəndaşlarının, həmçinin şəxsi vəsaitləri hesabına Türkiyədə təhsil alan və maddi imkanları məhdud olan tələbələrimizin müəyyən bir qisminə bu dövr ərzində dəstək göstərilməsi məqsədilə onlara 01.04.2020 tarixdən etibarən Azərbaycanın Türkiyədıki səfirliyinə müraciət etmələri üçün imkan yaradılıb. 

Bu günədək daxil olan 22 000-ə yaxın müraciətin böyük bir qismi səfirlik tərəfindən təhlil olunub və bu kateqoriyaya aid olan 10 000-ə qədər vətəndaşımıza Azərbaycan Respublikasının Dövlət Neft Şirkətinin (SOCAR) dəstəyi ilə qida və yaşayış təminatı ilə bağlı yardım edilib. 

Qeyd edək ki, müraciət edən vətəndaşlarımızın rahatlığının artırılması, daxil olmuş müraciətlərin emalı prosesinin sistemləşdirilməsi və yardımların çatdırılması prosesinin sürətləndirilməsi məqsədilə bu gündən etibarən müraciətlərin qəbulu prosesinin yeni istifadə verilmiş elektron sistem üzərindən aparılmasın başlanılmışdır (www.support.edu.az).

Hazırda qalan və yeni daxil olan müraciətlərin də təhlil olunmaqdadır və mövcud vəziyyət davam etdiyi dövrdə qeyd olunan kateqoriyaya aid olan vətəndaşlarımıza dəstək veriləcək.

Eyni zamanda şəxsi məlumatlar yanlış və ya natamam qeyd olunduğundan, bəzi müraciətlərə baxılması zamanı problemlər yaranmışdır ki, həmin şəxslərdən, hələ də dəstəyə ehtiyacı olduğu təqdirdə, yeni sistem üzərindən təkrar müraciət edərək, əvvəlki müraciətlərini tamamlamaqları xahiş olunur".

Mənbə: