Qanlı Yanvar hadisələrində 11 nəfər lənkəranlı şəhid olub

Azərbaycan xalqının qan yaddaşına əbədi həkk olunmuş 20 Yanvar hadisələrindən iyirmi doqquz il ötür. Qanlı faciədən uzun illər keçməsinə baxmayaraq, xalqımız o müdhiş gecəni daim xatırlayır, bu vəhşiliyi törədənlərə öz dərin nifrətini bildirir.

AZƏRTAC-ın bölgə müxbiri xəbər verir ki, Qanlı Yanvar faciəsinin ildönümündə Lənkəranda şəhidlərin xatirəsi ehtiramla anılıb. Yanvarın 19-da səhər saatlarından başlayaraq minlərlə rayon sakini şəhərin mərkəzində yerləşən Şəhidlər xiyabanına gələrək 20 Yanvar qurbanlarının xatirəsini yad edib.

Lənkəran Şəhər İcra Hakimiyyətinin başçısı Taleh Qaraşov, hüquq-mühafizə orqanlarının rəhbərləri, əmək kollektivlərinin, ictimaiyyətin nümayəndələri Şəhidlər Xatirə Kompleksinin önünə gül-çiçək dəstələri düzüblər.

Mərasimdə qeyd olunub ki, Azərbaycan xalqının tarixinə qanlı hərflərlə yazılmış 20 Yanvar hadisələrində Sovet İttifaqı ordusunun vəhşiliyi nəticəsində yüzdən çox insan qətlə yetirilib, 700-dən çoxu isə yaralanıb. Qətlə yetirilənlər və yaralananlar arasında qadınlar və uşaqlar da vardı.

Diqqətə çatdırılıb ki, 1990-cı ilin Yanvar hadisələri zamanı milli azadlıq uğrunda mübarizədə 11 nəfər lənkəranlı şəhid olub. Onlardan 5-i Bakıda, 6-sı Lənkəran rayonunun Haftoni qəsəbəsində sovet ordusunun cəza dəstəsi ilə qeyri-bərabər döyüşdə şəhidlik zirvəsinə ucalıb.

Lənkəranda 20 Yanvar şəhidlərinin xatirəsinə möhtəşəm abidə kompleksi ucaldılıb, şəhərin küçələrinə onların adları verilib, məzarları ətrafında abadlıq-bərpa işləri görülüb.