Postda yoxlama: erməninin nərd taxtası götürüldü

Bu gün Beynəlxalq Qızıl Xaç Komitəsi (BQXK) əməkdaşlarının müşayiəti ilə “Laçın” sərhəd-buraxılış məntəqəsindən Ermənistana sərbəst şəkildə keçid etmək istəyən erməniəsilli şəxsə məxsus, üzərində qondarma qurumun “gerbi” təsvir olunan nərd taxtası müsadirə edilib.

Ens.Az-ın məlumatına görə,bu barədə “Report”un ərazidə müşahidə aparan əməkdaşı məlumat verib.

Belə ki, keçid zamanı erməniəsilli şəxsin sənədləri yoxlanıldıqdan sonra onun əl çantasına Dövlət Gömrük Komitəsinin və Dövlət Sərhəd Xidmətinin əməkdaşları tərəfindən baxış keçirilib.

Baxış zamanı erməniəsilli şəxsə məxsus nərd taxtasında qondarma qurumun “gerbi”nin təsvir olunduğu aşkarlanıb. Daha sonra həmin nərd taxtası müvafiq qurumların əməkdaşları tərəfindən müsadirə edilib.

Xatırladaq ki, bu, “Laçın” SBM-də erməniəsilli şəxslərin ilk təxribat cəhdi deyil. Bundan öncə avqustun 22-də erməniəsilli qadınlardan biri üzərində qondarma rejimin “bayrağı” əks olunmuş çanta ilə sərhəd-buraxılış məntəqəsinə daxil olub. Sərhədçilərimiz həmin şəxsin bu təxribatçı hərəkətinə irad bildiriblər. Avqustun 25-də isə ermənilərin təcili yardım maşınının üzərinə vurduqları qondarma rejimi təbliğ edən banner sökülüb.