Nazir: "Neftə olan tələbat böhrandan əvvəlki səviyyəyə 2021-ci ildə çıxacaq"

Neftə olan qlobal tələbat böhrandan əvvəlki səviyyəyə 2021-ci ildə çatacaq.

"APA-Economics" TASS-a istinadən xəbər verir ki, bunu Rusiyanın Energetika naziri Aleksandr Novak deyib.

Onun sözlərinə görə, neft bazarını sabitləşdirən "OPEC+" razılaşması olmasaydı, neftin qiyməti mövcud səviyyədən ən azı iki dəfə aşağı olardı.

Nazir qeyd edib ki, neftə olan tələbat hazırda 90% bərpa olub, 2021-ci ilin birinci və ya ikinci yarısında isə böhrandan əvvəlki səviyyəyə çata bilər: "Görürük ki, may ayından avqust ayınadək istər qlobal, istərsə də daxili bazarlarda neftə tələbat bərpa olunur. Lakin buna baxmayaraq, hələ böhrandan əvvəlki səviyyəyə çatmayıb. Tələbat 90% səviyyəsinə çatıb. Bəzi təxminlərə görə, tələbat 2021-ci ildə bərpa ediləcək, fərqli təxminlər var – ya ilin birinci, ya da ikinci yarısında. Dünya iqtisadiyyatının bu gün necə bərpa olunacağından və məhdudlaşdırıcı tədbirlərin aradan götürüləcəyindən çox şey asılıdır".