Mədəkiçiltmə əməliyyatı hansı fəsadlara yol açır?

Azərbaycan Tibb Universitetinin Tədris Cərrahiyyə Klinikasında əhali arasında mədə kiçiltmə əməliyyatı kimi tanınan növbəti əməliyyat icra olunub.

Publika.az xəbər verir ki, klinikanın ümumi cərrahı, 2-ci cərrahi xəstəliklər kafedrasının assistenti tibb üzrə fəlsəfə doktoru Elçin Abdinovun sözlərinə görə, pasientə “sleeve gastroectomy”, yəni mədənin boylama boruvari rezeksiyası əməliyyatı aparılıb:

“Bu, bariatrik əməliyyatlardan biridir. Öz sadəliyi, tez icra olunması ilə digər metodlardan seçilir. Əməliyyatın nəticəsi qənaətbəxş olduğundan, bütün dünyada bu əməliyyat növündən geniş istifadə olunur. Bu əməliyyat piylənmədən, artıq çəkidən, həmçinin digər ağır metabolik xəstəliklərdən əziyyət çəkən şəxslərdə icra olunur. Biz də piylənmə ilə bağlı müraciət edən pasientləri ətraflı müayinə etdikdən sonra mədənin boylama boruvari kiçildilməsi əməliyyatına qərar veririk”.

Son vaxtlar mediada bariatrik əməliyyatın orqanizmdə başqa xəstəliklər, ciddi fəsadlar yaratması ilə bağlı müzakirələr aparılır. Elçin Abdinov hesab edir ki, bu cür ittihamlar ilk növbədə elmi tədqiqatlara əsaslanaraq söylənilməlidir. Əgər belə hallar həqiqətən də olarsa, araşdırılmalıdır: “Lakin arada gəzən söhbətləri, şou aləmində səslənən əsassız ittihamları yaymaq düzgün deyil. İndi hər bir kəsin internetdə bu əməliyyatla bağlı araşdırma aparması imkanı var”.

Həkim hər kəsə ciddi tibbi saytlarında yerləşdirilən məlumatlarla tanış olmağı, heç bir elmi əsası olmayan ittihamlara önəm verməməyi məsləhət görür.