Həbibi - Dur uru, ey saqiyi-məhru bizə

Həbibi - Dur uru, ey saqiyi-məhru bizə

Dur uru, ey saqiyi-məhru bizə,
Sun bərü bir qaç qədəh vinu^[1] bizə.

Ləblərindir gərçi kim, tiryaki-can,
Əfi zülfin içirür ağu bizə.

Gün yüzündən şadü xəndandır könül,
Saçların əbri salar qayğu bizə.

Eyni-aşubi-cahandır gözlərin,
Afəti-can oldu ol cadu bizə.

Rövzəyi-hüsni-camalın görəli,
Hasil oldu cənnəti-minu bizə.

Gərçi kim səhmi-səadətdir qaşın,
Ox edər tiz ol kəman-əbru bizə.

Dür dişinlə ləli-nabun zövqini
Verməz, ey can, laləvü lölö bizə.

Abi-heyvan çeşməsindən dadlıdur,
Versə ləlin çün bir içim su bizə.

Rəhzəni-candır, Həbibi, xaki-dust,
Vəh ki, edər ol dil siyəh hindu bizə.

 

Qeydlər

1. ↑ Çaxır, şərab