Gəncəli məzunlardan 1105 nəfəri respublikanın müxtəlif ali təhsil müəssisələrinə daxil olub

2017-2018-ci tədris ili üzrə Gəncə Şəhər Təhsil İdarəsinin tabeliyindəki 46 ümumtəhsil məktəbinin 11-ci sinif şagirdlərindən 2 min 323 nəfər məzun olub.

Gəncə Şəhər Təhsil İdarəsinin müdiri Zakir Hüseynov AZƏRTAC-ın bölgə müxbirinə bildirib ki, həmin məzunlardan 1824 nəfəri builki ali və orta-ixtisas təhsili müəssisələrinə qəbulda iştirak ediblər. Onlardan 1105 nəfəri ali təhsil müəssisələrinə qəbul olublar.

Qəbul imtahanlarında 358 məzun 200-300, 461 məzun 300-500, 174 məzun 500-600, 90 məzun 600-700 intervalda, 1 məzun isə maksimum nəticə - 700 bal toplayıb.

Həmçinin orta məktəbi bitirən məzunlardan 4 nəfəri qızıl, 2 nəfəri isə gümüş medala layiq görülüb. Qızıl medala layiq görülən və ali məktəblərə keçirilən qəbul imtahanlarında 700 bal toplayan, yəni maksimum nəticə göstərən abituriyent - İsrafil Məmmədov adına 27 saylı fizika-riyaziyyat-kimya təmayüllü məktəb-liseyin məzunu Selcan Məmmədli ADA Universitetinin Hüquqşünaslıq fakültəsinə daxil olub.