Ərdoğan İlham Əliyevlə Qazaxıstanı müzakirə etdi

Türkiyə Prezidenti Rəcəb Tayyib Ərdoğan və Qazaxıstan Prezidenti Qasım-Jomart Tokayev arasında telefon danışığı baş tutub.

Ens.az Axar.az-a istinadən xəbər verir ki, liderlər Qazaxıstandakı son hadisələri müzakirə ediblər.

Türkiyə dövlət başçısı Qazaxıstanda baş verən olayları diqqətlə izlədiyini və Qazaxıstanla həmrəy olduğunu qeyd edib.

Danışıqlar zamanı Ərdoğan Qazaxıstanın yeni hökumətinin tezliklə formalaşmasına ümid etdiyini bildirib.

"Türkiyə lazım gələrsə, Qazaxıstanla təcrübə və texniki biliklərini bölüşməyə hazırdır", - Ərdoğan söyləyib.

Bundan əlavə, Ərdoğan Türk Dövlətləri Təşkilatına (TDT) üzv dövlətlərin digər liderləri ilə də telefon danışığı aparıb.

Həmçinin, Türkiyə prezidenti Azərbaycan, Qırğızıstan və Özbəkistan dövlət başçıları İlham Əliyev, Sadır Japarov və Şövkat Mirziyayevlə söhbəti zamanı Qazaxıstanın dialoq vasitəsilə problemlərin öhdəsindən gələcəyinə əmin olduğunu ifadə edib.

Qeyd edək ki, hazırda təşkilata məhz Türkiyə sədrlik edir.