Dövlət əmlaklarının özəlləşdirilməsi üzrə növbəti hərrac dekabrın 4-də təşkil ediləcək

Əmlak Məsələləri Dövlət Komitəsi tərəfindən dövlət əmlaklarının özəlləşdirilməsi üzrə növbəti hərraclardan biri dekabrın 4-də keçiriləcək.

Komitədən AZƏRTAC-a bildirilib ki, dekabr ayının ilk hərracında vətəndaşlar 122 dövlət əmlakı üzrə seçim edə biləcək. Bunlardan 76-sı kiçik dövlət müəssisə və obyekti, 21-i qeyri-yaşayış sahəsi, 17-si səhmdar cəmiyyəti, 8-i isə nəqliyyat vasitəsidir.

Özəlləşməyə çıxarılan kiçik dövlət müəssisələrinə mağazalar, restoranlar, təsərrüfat sahələri, poliklinika və digər əmlaklar aiddir. Bu dövlət obyektlərinin ümumi faydalı sahəsi 20 kvadratmetr ilə 3813 kvadratmetr arasındadır.

Məlumata əsasən, kiçik dövlət müəssisələrindən biri paytaxtın Binəqədi rayonunda yerləşən əmlak kompleksidir. Obyektin ümumi faydalı sahəsi 838,3 kvadratmetr, birlikdə özəlləşdiriləcəyi torpaq sahəsi isə 2853,4 kvadratmetrdir.

İnvestora yüksək gəlir qazandıra biləcək əmlaklar kimi Qusar Tədarük Satış Bazasını, Şəmkir yun tədarükü məntəqəsini, paytaxtın Xəzər rayonunda yerləşən yardımçı təsərrüfatı, 4 saylı kafeni də göstərmək olar.

Kiçik biznes fəaliyyətində əlverişli xidmət və ofis obyekti kimi istifadəyə imkan verən qeyri-yaşayış sahələrinin ümumi faydalı sahəsi 14,4 kvadratmetrdən 1612,1 kvadratmetrədəkdir.

Bu növ dövlət əmlaklarından 5-i Sumqayıtda, digərləri isə paytaxtın ayrı-ayrı rayonlarında yerləşir. Bakı şəhəri, Nizami rayonu, R.Rüstəmov küçəsindəki qeyri-yaşayış sahəsinin ümumi faydalı sahəsi 49,2 kvadratmetrdir.

Hərraca çıxarılan səhmdar cəmiyyətləri arasında kəndkimya, nəqliyyat, təmir, istehsal və digər iqtisadi sahələrdən olan müəssisələr var. Belə səhmdar cəmiyyətlərinə “Ucar Tikinti Avtonəqliyyat”, “Lənkəran Mebel”, “Əli Bayramlı Aqrotəmir” və digərləri aiddir. İnvestorlar hərracda iştirak edərək bu səhmdar cəmiyyətlərinin dövlətə məxsus 30-45 faizlik səhm paketlərini özəlləşdirə bilər.

Özəlləşdiriləcək nəqliyyat vasitələrinin markaları və istehsal tarixləri müxtəlifdir. “VAZ”, “Nissan”, “BMW” və “Mercedes” kimi şirkətlərin istehsal etdiyi avtomobillərin buraxılış tarixi 1985-2006 illəri əhatə edir. Bütün dövlət əmlakları haqqında ətraflı məlumat əldə etmək və sifariş vermək üçün hər kəs komitənin rəsmi saytına (emdk.gov.az) və özəlləşdirmə portalına (privatization.az) daxil ola bilər. Bu elektron mənbələrdə hərraca çıxarılan hər bir obyektin adı, ünvanı, ümumi faydalı sahəsi, eləcə də digər əmlaklar barədə lazımi informasiya mövcuddur.

Əmlak Məsələləri Dövlət Komitəsi yerli və xarici investorları, sahibkarları, iş adamlarını və mülkiyyət sahibi olmaq istəyən hər bir kəsi özəlləşmədə fəal iştirak etməyə dəvət edir.