Çindən Türkiyəyə təxliyə edilən vətəndaşlarımız Azərbaycana çatıblar

“Uhanda karantinə çox ciddi şəkildə əməl olunur. Şəhərə giriş-çıxış bağlanıb. Nə yerli, nə də xarici vətəndaş Uhanı tərk edə bilməz. Artıq şəhərlərdən əlavə universitetlər də karantinə alınıb. Biz təxliyə olunmuşuq, o demək deyil ki, bütün xarici vətəndaşlar təxliyə olunub".

APA-nın xəbərinə görə, bunu jurnalistlərə açıqlamasında Çinin Uhan şəhərindən yayılan ölümcül koronavirus epidemiyasına görə bu ölkədən Türkiyəyə təxliyə edilərək 14 gün Ankarada xəstəxanada karantində saxlanılan və bu gün oradan Azərbaycana yola salınan 6 Azərbaycan vətəndaşından biri Leyla Quliyeva bildirib.

O deyib ki, Uhanda təxliyə olunmayan çoxlu xarici vətəndaş var: "Dövlətimizin qüdrətindən irəli gəlir ki, biz 8 günə Çini tərk edə bildik. Bizim kimi az ölkə var ki vətəndaşlarını çıxarda bilib”.

L. Quliyeva bildirib ki, Çinin digər vilayətlərində də azərbaycanlı tələbələr var: "Çində təxminən 500-ə yaxın azərbaycanlı tələbə var. Bildiyim qədərilə, onlarla da intensiv əlaqə saxlanılır, ehtiyacları qarşılanır. Yəqin ki, onların da yaxın zamanda təxliyəsi baş tutacaq”.

***

16:43

Çindən Türkiyəyə təxliyə edilən 6 vətəndaşımız Azərbaycana çatıb.

APA xəbər verir ki, 6 Azərbaycan vətəndaşından biri 7 yaşlı qız olmaqla 3-ü eyni ailənin üzvləridir.

Bildirək ki, Çindən Türkiyəyə təxliyə edilən Azərbaycan vətəndaşları Ankarada Zekai Tahir Burak xəstəxanasında 14 gün karantində saxlanılıblar. Qeyd edək ki, Türkiyəyə məxsus ambulans-təyyarə yanvarın 31-də Çinin koronavirus yayılan Uhan şəhərinə yola düşüb. Fevralın 1-də təyyarə ilə 42 nəfər təxliyə edilib ki, onlardan 32 nəfəri Türkiyə, 6 nəfəri Azərbaycan, digərləri isə Albaniya və Gürcüstan vətəndaşları olub. Nazirliyin mətbuat xidmətindən APA-nın sorğusuna verilən cavaba görə, həmin şəxslər Türkiyədə 14 gün karantin müddəti keçiblər. “Buna görə də onların ölkəyə qayıtdıqdan sonra təkrar karantinə alınmasına ehtiyac yoxdur”, - deyə Nazirlikdən bildirilib.

 ***

14:40

Çindən Türkiyəyə təxliyə edilən vətəndaşlarımız Azərbaycana yola salınıb.

APA-nın Türkiyə bürosunun xəbərinə görə, bu barədə Azərbaycanın Türkiyədəki səfərliyindən bildirilib. 6 Azərbaycan vətəndaşından biri 7 yaşlı qız olmaqla 3-ü eyni ailənin üzvləridir.

Azərbaycanın Türkiyədəki səfiri Xəzər İbrahim başda olmaqla səfirliyin nümayəndə heyəti xəstəxanadan buraxılan azərbaycanlılarla birlikdə Ankarada yerləşən Heydər Əliyev parkına gəliblər. Onlar parkda Heydər Əliyevin heykəli qarşısına gül dəstələri qoyublar. Azərbaycan, Türkiyə və Çin dövlətlərinə öz təşəkkürlərini bildiriblər.

Xəzər İbrahim APA-ya bildirib ki, Çindən təxliyə olunan vətəndaşlarımızın sayı ilk gündən 6 nəfər olub: “Onların sayının 7 nəfər olması ilə bağlı deyilənlər yanlışdır”.  

 ***

10:36

Çindən Türkiyəyə təxliyə edilən Azərbaycan vətəndaşları Ankarada Zekai Tahir Burak xəstəxanasından buraxılıblar.

APA-nın Türkiyə bürosunun xəbərinə görə, 6 Azərbaycan vətəndaşından biri 7 yaşlı qız olmaqla 3-ü eyni ailənin üzvləridir.

Xəstəxanadan buraxılan 6 Azərbaycan vətəndaşı Azərbaycanın Türkiyədəki səfirliyinin nümayəndələri ilə birlikdə Ankarada yerləşən Heydər Əliyev parkına gəliblər. Onlar parkda Heydər Əliyevin heykəli qarşısına gül dəstələri qoyublar, Azərbaycan, Türkiyə və Çin dövlətlərinə öz təşəkkürlərini bildiriblər.

Azərbaycanın Türkiyədəki səfirliyindən APA-ya verilən xəbərə görə, onlar gün ərzində Azərbaycana yola salınacaqlar.

Qeyd edək ki, Türkiyəyə məxsus ambulans-təyyarə yanvarın 31-də Çinin koronavirus yayılan Uhan şəhərinə yola düşüb. Fevralın 1-də təyyarə ilə 42 nəfər təxliyə edilib ki, onlardan 32 nəfəri Türkiyə, 6 nəfəri Azərbaycan, digərləri isə Albaniya və Gürcüstan vətəndaşlarıdır. Ekipaj, texniki və tibbi heyət üzvləri ilə birlikdə təxliyə edilənlərin sayı 61 nəfərdir. Ekipaj, texniki və tibbi heyət üzvləri bundan əvvəl evə buraxılıblar. 

Türkiyənin Səhiyyə naziri Fəxrəddin Qoca bu gün bildirib ki, analizin nəticələrinə əsasən, 42 nəfərdə koronavirus aşkarlanmayıb. Nazir qeyd edib ki, onların 14 günlük karantin müddəti başa çatıb.

Azərbaycanın Səhiyyə Nazirliyi Çindən Türkiyəyə təxliyə edilən Azərbaycan vətəndaşlarının yenidən karantinə götürülməsi məsələsinə aydınlıq gətirib.

Nazirliyin mətbuat xidmətindən APA-nın sorğusuna verilən cavaba görə, həmin şəxslər Türkiyə 14 gün karantin müddəti keçiblər. “Buna görə də onların ölkəyə qayıtdıqdan sonra təkrar karantinə alınmasına ehtiyac yoxdur”, - deyə Nazirlikdən bildirilib.